Endama Koordînasyona Kongra Star Jiyan Hisên: Çalakiyên 8`ê Adarê geş bikin

Der barê girîngiya tevlêbûna çalakiyên bi boneya 8`ê Adarê Roja Jinan a Cîhanê yên li Rojavayê Kurdistanê, endama Koordînasyona Kongra Star Jiyan Hisên ji ANHA`yê re axivî.

Jiyan Hisên bi bîr xist ku ji ber ku Rojava rastî êrişeke pir dijwar hat, coşa pêşwazîkirina wan a ji 8`ê Adarê îsal cuda ye. Ev 14 sal e jinên ji pêkhateyên cuda yên li herêmê ji bo ku mafê xwe bi dest bixin û misoger bike tê dikoşiya, bi vê rêyê jinan gelek destkeftiyên di qadên siyasî, leşkerî, aborî û çandî de bi dest xistin û got: “Ji bo ku em destkeftiyên xwe yên heyî biparêzin, tê xwestin ku em asta têkoşîna xwe bilindtir bikin. Em hîn bêhtir li qadan bin û civaka xwe bi rêxistin bikin.”

Di axaftina xwe de Jiyan Hisên bal kişand ser girîngiya hebûna Yekîneyên Parastina Jin (YPJ) û da zanîn ku YPJ`ê ji destpêkê ve bi erka xwe ya misogerkirina hebûna jinan di qada leşkerî de parast, xak û gelê wan jî pê re hate parastin.

Jiyan Hisên destnîşan kir ku ji ber ku hikumeta demkî ya Sûriyeyê nasname û hebûna jinan qebûl nakin, ew ê li beramberî zîhniyeta hikumetê têkoşîna xwe bidomînin. Jiyan da zanîn ku ew ên bi vê têkoşînê Sûriyeyeke demokratîk ku di nav de mafên hemû pêkhateyan bê parastin û mafên jinan di destûra Sûriyeyê ya nû de were misogerkirin, ava bikin.

Jiyan Hisên bang li hemû jinên li deverên cuda û bi taybet ên ku li Rojavayê Kurdistanê kir ku bi deng, reng û hêza xwe dakevin qadan, daxwaza misogerkirina hebûna nasnameya jinan bikin û bi wê daxwazê jî çalakiyên 8`ê Adarê geş bikin.

(k)

ANHA