Di konferansa Meskenê de rola komînan di avakirina civakê de hat nîqaşkirin

Meclisa Rêveber a kantona Tebqayê Konferansa Komînan a 1ˊemîn a bajarê Meskenê bi diruşma "Konîn şaneya bingehîn a avakirina civaka demokratîk e" li hola meclisa Partiya Sûriya Pêşerojê ya bajêr li dar xist. Di konferansê de hevserkên komînên bajêr û gundewarê wê, nûnerên Meclisa Rêveber û Meclisa Gelan a kantonê amade bûn.

Piştî deqeya rêzgirtinê, cîgirê hevserokatiya Meclisa Qanûnsaz a kantona Tebqayê Hisên El Dixêm perspektîfên Rêber Apo ên têkildarî têgeha komunê û jiyana komînal xwendin.

Piştre sîstema civakî li gorî Hevpeymana Civakî ji hêla hevserkê meclisa Sivîl a Meskenê Îbrahîm El Hekar ve hat xwendin, tê de hat gotin ku komîna bingeha rêxistinî ya sîstema civakî ya Rêveberiya Xweseriya Demokratîk a Bakur û Rojhilatê Sûriyeyê ye.

Girêdayî mijarê beşdaran nêrîn û pêşniyarên xwe yên der barê başkirina rewşa xizmetguzarî weke av, kehrebe, binesazî, kalîteya nan û beşa çandiniyê de kirin.

Beşdaran destnîşan kir ku hîna herêmê êş û zehmetiyên şopên paşguhkirin û dûrxistina bi salane ya di serdema rejîma Baasˊê û DAIŞˊê de dikişîne.

Di dawiya konferansê de, nûnerên Meclisa Gelan, Meclisa Rêveber a kantona Tebqayê girîngî da hevgirtina hewlan di navbera Rêveberiya Xweser û komînan, da ku rewşa xizmetguzarî were bipêşxistin û hewcedariyên şêniyan were dabînkirin.

Ev konferans, di çarçoveya rêzecivînên amadekariyê yên li bajarên Dêr Hafir, Tebqa, Mensûra û Curniyê ji bo lidarxistina konferansa giştî ya meclisên sivîl ên kantona Tebqayê de di dawiya vê mehê de hat lidarxistin.

(fr)

ANHA