Çalakiyên 4’ê Nîsanê dewam dikin
Bi boneya rojbûna Rêber Abdullah Ocalan semîner hatin dayîn, şahî hatin lidarxistin û dar hatin çandin.
Li boneya 4’ê Nîsanê rojbûna Rêber Abdullah Ocalan li Bakur û Rojhilatê Sûriyeyê û Helebê rêzeçalakî hatin lidarxistin.
QAMIŞLO
Li parka Helebce ya li taxa Kornîş a Qamişloyê darên fêkî û yên xemilandinê ji aliyê dayikan ve hatin çandin.
Pêngava çandina 100 daran a ji aliyê Komeleya Stêrk a Şopandin û Parastina Mafên Zarokan a Bakur û Rojhilatê Sûriyeyê ve hatibû destpêkirin, dewam dike. Di çarçoveya pêngaavê de zarokên komînên Şehîd Demhat Qamişlo û Şehîd Mazlûm ên taxa Elya û Komîna Şehîd Seydo ya taxa Cûdî (Qenat Siwês) dar çandin.
Pêngava çandina daran dê heta 4’ê Nîsanê dewam bike.
ÇILAXA
Li gundê Zixêra yê navçeya Çilaxa ya kantona Cizîrê jî semînerk li ser 4’ê Nîsanê ji aliyê Kongra Star ve hate dayîn.
Ji rêveberên Mala Jinan a navçeya Çilaxa Huda Elî rojbûna Rêber Abdullah Ocalan û cejna Ekîto pîroz kir û got: "Ji bo ku em ramanên Rêber Abdullah Ocalan fêm bikin, divê em li derdora wî kom bibin. Ramanên Rêbertî rêya yekane ya naskirina heqîqetê ne."
Piştî semînerê darên fêkî û gulan hatin çandin û dirûşma "Bê Serok jiyan nabe" hat berzkirin.
HELEB
Komîteya Perwerde û Fêrkirinê ya Civaka Demokratîk a Helebê bi boneya rojbûna Rêber Abdullah Ocalan şahiyek li dar xist. Şahî li Dibistana Şehîd Avaşîn Demhat bi beşdariya şêniyên taxê û endamên saziyên sivîl hat lidarxistin.
Beşdaran dar li hewşa dibistanê çandin. Piştre koma stranan a Şehîd Egîd Cîlo û koma dîlanan a Şehîd Cûdî Amanos hunerên xwe pêşkêş kirin.
Şahî bi dirûşmên "Bê Serok jiyan nabe" bi dawî bû.
(bb)
ANHA
