Li Minbicê panela 8ʹê Adarê

Panel li avahiya Rêveberiya Sivîl a Demokratîk a Minbic û gundewarên wê hat lidarxistin.  Endamên jin ên saziyên civaka sivîl, partiyên siyasî, Meclisa Leşkerî ya Jinan û Hêzên Ewlekariya Hundirîn- Jin û Rêveberiya Sivîl di panelê de amade bûn.

Destpêka panelê sînevîzyonek li ser têkoşîna jina azad hat dayîn. Piştre Hevseroka Navenda Çand û Hunerê ya Minbicê Roz Îshaq qala dîroka jinan û rola wan di pêşxistina civakan de kir û got: "Destpêka dîrokê jinan roleke girîng û mezin di pêkanîna civakbûyîna mirovan de list. Jin hêza bingehîn a avakirina civakan û pêşxistina civakê bû. Li civakên ku ji aliyê jinan ve dihatin birêvebirin, azadî, edalet û wekhevî hebûn. Lê bi derketina pergala hiyerarşîk a dewletê re, mekanek û pîroziyên jinan ji dest hatin dayîn."

Roz Îshaq bi navê Platforma Çalakiyên Hevbeş ên Tevger û Rêxistinên Jinan ên Bakur û Rojhilatê Sûriyeyê 8ʹê Adarê li Rêber Abdullah Ocalan, tevahî jinên cîhanê, serhildana li Rojhilatê Kurdistanê û Îranê ya bi dirûşma "Jin, Jiyan, Azadî" pîroz kir.

Her wiha bang li hemû jinên cîhanê kir ku piştgiriyê bidin serhildana jinan a li Rojhilatê Kurdistanê û Îranê û helwest û têkoşîna xwe li hember planên li ser jinan bikin yek.

Roz Îshaq di dawiyê de got: "Çawa jinan bûyera bi êş û girava xwe kirin cejna hêviyê, dem hatiye ku em jî 8ʹê Adarê veguherînin roja azad û demokrasiyê. Em meha Adarê bikin meha têkoşîn û berxwedanê, em eşrê dewletan hilweşînin, maskan bînin xwarê û rastiyê ji tevahî cîhanê re derxînin holê."

Hevseroka Meclisa Rêveber a Rêveberiya Sivîl a Demokratîk a Minbic û gundewarê wê Nezîfe Xelo jî 8ʹê Adarê li tevahî jinan pîroz kir û bal kişand ser serhildanên jinan ên li gelak welatan.

Nezîfe Xelo îşaret bi şoreşa jinan a li Bakur û Rojhilatê Sûriyeyê jî kir û got: "Şoreşa jinan a li Bakur û Rojhilatê Sûriyeyê bala tevahî cîhanê kişand. Divê em vê şoreşê û destkeftiyên şehîdan biparêzin. Divê li hemberî hemû kesên ku dixwazin şoreşa me têk bibin, bisekinin."

Panel bi nîqaşên di navbera beşdaran de bi dawî bû.

(bb)

ANHA