Şêniyên Reqayê li dijî êrişên dagirkeriyê derketin

Şêniyên Reqayê tevî Meclisa Malbatên Şehîdan, Kombûna Jinan a Zenûbiya, Rêvberiya Xweser a Bakur û Rojhilatê Sûriyê, Hêzên Ewlekariya Hundirîn, meclis û komîn beşdarî xwepêşandanê bûn. Xwepêşdanê ji avahiya Wafîdîn heta herêma Bab Bexdad a rojhilatê bajêr dewam kir.

Xwepêşandêran wêneyên rêber Abdullah Ocalan, alên QSD`ê û pankertên bi nivîsên "Em Kurd, Ereb, Suryan, Asûr û Tirkmen li hemberî dagirkeriya Tirk bibin yek" û " Na ji êrişên dewleta Tirk li dijî Bakur û Rojhilatê re" hildan.

Xwepêşandan li herêma Bab Bexdad veguherî mitîngê. Li wir Berdevka Meclisa Jinan a Meclisa Malbatên Şehîdan Zeyneb El Xelef axivî. Zeyneb got: "Êrişên dewleta Tirk ên bi balafiran û çekên giran li dijî welatiyên ku di salên borî de radestî siyasetên wê nebû, asta herî bilind a terorê ye."

Zeynab her wiha da zanîn ku zêdekirina êrişên dagirkeriya Tirk îsbat dike ku tevahî plan û siyasetên wê li hember projeya Rêveberiya Xweser a demokartîk bi bin ketine.

Berdevka Kombûna Jinan a Zenûbiya ya Reqa û gundewarên wê Sosin El Xelef jî êrişên dewleta Tirk ên li dijî Bakur û Rojhilatê Sûriyê şermezar kirin û got ku ev êriş dikevin asta sûcên şer.

Sosin El Xelef diyar kir ku gelê Bakur û Rojhilatê Sûriyê li hember êrişên dagirkeriya Tirk li kêleka hêzên QSD'ê ye.

(dm)

ANHA