Li Qamişloyê bi hezaran kes li dijî êrişan daketin qadan

Bi hezaran şêniyên Qamişloyê,  di nav de endamên Tevgera Civaka Demokratîk (TEV-DEM) û yekitiyên wê, Partiya Yekitiya Demokratîk (PYD), Kongra Star, Meclisa Malbatên Şehîdan, Yekitiya Jinên Ciwan, Tevgera Ciwanên Şoreşger a Sûriyê, endamên saziyên çandê, siyasî û ewlehiyê bi meşekê êrişên dewleta Tirk a dagirker ên li ser herêmê şermezar kirin.

Meş ji Çerxerêya Sonî ya li aliyê rojhilatê Qamişlo dest pê kir. Di meşê de alên TEV-DEM, PYD, Meclisa Malbatên Şehîdan, wêneyên rêber Ocalan,  pankartên bi nivîsên "Hevkariya bi dewleta Tirk a dagirker re dijminatiya hemû gelan e", "Bi vîna gelan û gerîla em ê li hember çekên kîmyewî li ber xwe bidin, dagirkerî û îxanetê têk bibin" û "Bijî berxwedana gerîla" hatin hildan. Her wiha dirûşmên "Gerîla vîna me ye", "Bijî berxwedana rêber Ocalan", "Na ji bêdengiya navneteweyê re", "Gerîla nûnertiya me dike" û "Bijî berxwedana Rojava" hatin berzkirin.

Xwepêşanderan li ber Navenda Çand û Hunerê Mihemed Şêxo ala dewleta Tirk şewitandin û dirûşmên "Hilweşe dewleta dagirker û sûcdar" berz kirin.

Piştre hevserokê Meclisa Malbatên Şehîdan a Qamişloyê Mahsûm Hesen axivî û wiha got: "Êrişên şeva din ên li ser Kobanê, li Dêrikê û herêmên din ên Başûrê Kurdistanê ne nû, lê berdewamiya zihniyeta Osmanî ya 500 salî ye ku bajar, tax, welatî û zarokan dike hedef."

Hesen bal kişand ser berxwedana gel û wiha domand: "Berxwedana gelên Kurdistanê, berxwedana rêber Ocalan a li Îmraliyê û berxwedana lehengane ya gerîlayên li Avaşîn, Metîna û Zapê  ji hemûyan re îsbat dike ku Erdogan û rejîma wî li ber hilweşînê ne  û ji bo ku vê hilweşînê binixumîne van êrişan pêk tîne."

Hesen bang li  gelê Bakur û Rojhilatê Sûriyê  kir ku derketina qadan, serî hildin û êrişan şermezar bikin.

Hesen di dewama axaftina xwe de diyar kir ku êrişa bi çekên giran û pêşketinî nayê wateya ku dewleta Tirk hewl dide bajarekî yan jî gelek bajaran dagir bike û got: "Armanca dewleta Tirk a dagirker û angaşta wê ji vê pirî mezintir e. Dewleta Tirk hewl dide sûdê ji peymanên ku niha têne îmzekirin û ji bidawîbûna sedsala peymana Lozanê bigire û Mîsaqî Millî vegerîne."

Hesen diyar kir ku hêzên hegemon û desthilat Rûsya û Amerîka û hêzên cîhanê bi rê ve dibin, li gorî biryar û perspektîfên wan û heta dayîna çekan ji bo dewleta Tirk dihêle ew şerê qirkirinê li dijî gelê herêmê pêk bîne.

Mahsûm Hesen wiha dawî li gotina xwe anî: "Çawa me bi vîn û israra xwe ya li ser fikrê rêber Ocalan û bi hezaran ji şehîdan xaka xwe parastin û projeya xwe ya demokratîk xiste pratîkê, wê cîhan giştî nikaribe me ji armanc, hêvî û rêya me ya ber bi azadiyê ve dûr bixe."

(fr)

ANHA