Dewleta Îranê baregehên partiyên Rojhilat bombebaran kirin

Dewleta Îranê navend û baregehên Hizbên Rojhilatê Kurdistanê yên li Başûrê Kurdistanê dubare topbaran kirin. Tê gotin şehîdek û 8 birîndar hene.

14 mijdar, 2022 08:55

NAVENDA NÛÇEYAN

Hate ragihandin ku rejîma Îranê di danê sibehê de bi dronan û muşekan baregehên Hizba Demokrata Kurdistanê ya Îranê, Komeleya Zehmetkêşan, Komeleya Şoreşgeran û Komeleya Kominîstan topbaran û bombebaran kirin.

Di saet 08:30’an de baregehên Hizba Demokrat a Kurdistanê ya Îranê ya li Koyê hat topbaran kirin.

Piştî topbaranê berdevkê Rêveberiya Tendirustiyê ya Koyê Hawkar Elî ji Rojnews’ê ragihand ku di encama topbaranê de kesek şehîd bûye û 6 kes jî birîndar bûne.

Her wiha li gorî Wezareta Tendirustiyê ya Herêma Kurdistanê, di encama bombebaranê de heta niha 8 birîndar û şehîdek gihandine nexweşxaneyê.

Piştî êrişa li ser Hizba Demokrat a Kurdistanê a Îranê, bi dronan êrişî baregehên Hizba Zehmetkêşan û Hizba Şoreşgeran hat kirin.

Berpirsê Peywendiyan yê Komeleya Şoreşgeran Saman Hisên ji Rojnews’ê ragihand ku bi 3 roketan êrişî navend û baregehan hat kirin lê ti ziyanên canî çênebûn.

Di saet 09:30’an de dewleta Îranê bi rêya topxaneyan baregehên Hizba Şoreşgeran topbaran kir.