'Komcivîna Salane ya yekem bo Qurbaniyên li Bakurê Sûriyê' dest pê kir

Hemwextî salvegera sêyemîn a êrişa artêşa Tirk a dagirker û çeteyên wê li ser herêma Serêkaniyê û Girê Spî yên dagirkirî, Komeleya “Hevdestî” ya qurbaniyan bi hevkariya rêxistina “Sûriyayiyên ji bo Rasteqînî û Dadmeniyê” Komcivîna Salane ya Yekem bo Qurbaniyên li Bakurê Sûriyê, li dar xist.

Komcivîn li Hola Zana ya bajarê Qamişlo tê lidarxistin. Armanc ew e ku balê bikişînin ser rewşa mafên mirovan li Serêkaniyê û Girê Spî yên dagirkirî û mekanîzmayên edaletê yên herêmî û navneteweyî nîqaş bikin û ji bo misogerkirina mafên koçber û penaberên bi darê zorê ji herêmên di bin dagirkeriya Tirkiyê de derektine, çareseriyan peyda bikin.

Hiqûqnas, parêzer û nivîskarên ji Bakur û Rojhilatê Sûriyê, her wiha Nivîsgeha Kar û Barên Koçber û Penaberan a Rêveberiya Xweser a Bakur û Rojhilatê Sûriyê û Komîteya Koçberên Serêkaniyê, beşdarî komcivînê bûne.

Li gorî komîteya amadekar, di komcivînê de dê li ser “têkbirina hevjiyan û aştiyê li Serêkaniyê û Girê Spî” fîlmek bê pêşandan. Her wiha dê du beşên sereke; (Rewşa mafên mirovan li herêmên Serêkaniyê û Girê Spî) û (Mekanîzmayên edaletê yên heyî di asta herêmî û navneteweyî de) bên nîqaşkirin.

Beşa yekemîn dê ji aliyê hiqûqnas û berpirsê têkiliyan ê Komîteya Koçberên Serêkaniyê Ciwan Îso û hiqûqnasa ji Efrîna dagirkirî û lêkolînera rêxistina Pêl Sewsen Reşîd, hevserokê Nivîsgeha Kar û Barên Koçber û Penaberan a Rêveberiya Xweser a Bakur û Rojhilatê Sûriyê Şêxmûs Ehmed û nivîskar û parêzer Şoreş Derwêş ve were birêvebirin.

Beşa duyemîn jî ji aliyê rojnamevan, atkîvîstê hiqûqî û endamê Meclisa Rêveberiya Platforma Genim û Zeytûn Mihyedîn Îso, hîndekarê navneteweyî yê qada piştevaniyê Ebdulsemî Ebdullah û dadmendê berê û şêwirmendên qanûnê Riyad Elî ve tê birêvebirin.

Hêjayî bibîrxistinê ye ku Komeleya Hevdestî, komeleyeke têkildarî qurbaniyên li Bakur û Rojhilatê Sûriyê ye. Li ser belgekirina hemû binpêkirinên mafên mirovan li Bakur û Rojhilatê Sûryiê dixebite, xwe dispêre delîl, belge û şahidiyan û hewl dide rastiyê eşkere bike, edaletê pêk bîne, hêza qurbaniyan bi pêş bixe, piştevaniyê bidin dozen wan, pê re civakeke ku dawa mafên xwe dike ava bikin.

(cx)

ANHA