Meclisa Edaleta Civakî ya Jinan civîneke berfireh ji malên jinan ên kantona Hesekê re li dar xist

Civîn li hola navenda kantonê ya li bajarê Hesekê li dar ket. Tê de nûnerên rêxistinên jinan ên kantona Cizîrê û endamên Meclisa Jinan a Edaleta Civakî beşdar bûn.

Di civînê de endama Meclisa Edaleta civakî Selwa Silêman perspektîfên rêber Abdullah Ocalan ên têkildarî azadiya jinan ku çareseriya yekane ya civakê ye û azadiya civakê bi azadiya jinan ve girêdayî ye, xwendin.

YEKKIRINA MEKANÎZMEYA KAR Û XEBATÊN MALÊN JINAN LI BAKUR Û ROJHILATÊ SÛRIYÊ

Civîn di çarçoveya biryara Meclisa Jinan a Edaleta Civakî ya Bakur û Rojhilatê Sûriyê de li dar ket ku di Gulana 2022`yan de li dar ketibû û tê de pêwîstî bi yekkirina rêzikname û mekanîzmeya kar û xebatên malên jinan li hemû kantonan hat kirin.

Endama Komîteya Edaleta Civakî Rêcîn Salih Xelef rêziknameya malên jinan xwend û Saziya Mala Jinan da nasandin ku saziyeke civakî ya sivîl e, armanc dike ku felsefeya edaleta civakî, çanda malbata demokratîk û jiyana hevbeş belav bike. Her wiha li dijî hemû cureyên kiryarên dermirovî yên li dijî jinan û zarokan tê dikoşe. Hewl dide pirsgirêkên jinan û malbatê çareser bike. Yek ji saziyên edaleta civakî ye.

Her wiha Rêcîn Xelef erk û peywirên malên jinan ên li herêmê bi bîr xistin.

Piştî xwendina rêziknameyê, beşdaran nêrînên xwe parve kirin û di dawiyê de gelek pêşniyar kirin jê: Lidarxistina dewreyên vekirî da ku jinan bikarin tev lê bibin, danîna bernameyên ji bo mehên bê ji bo diyarkirina kar û xebatên jinan mîna lidarxistina hemleyên hişyariyê di nava komînan de ji aliyê edaleta jinan, zêdekirina bernameyên hişyariyê bi rêya ragihandinê, hişyarkirina jinan û şîrovekirina qanûnên jinan, lidarxistina civînan bi dadgeh, malên jinan û komîteyên lihevanînê re û zêdekirina koordîneyê di navbera malên jinan û saziyên edaleta civakî de.

ANHA