​​​​​​​Meclisa Leşkerî ya Hesekê: Hêzên kurdistanî derbeyên giran li dagirkeriya Tirk dixin

Meclisa Malbatên Şehîdan ji bo bîranîna 93 şehîdên ji Hesekê ku di dem û cihên cuda de şehîd bûne merasîmek li dar xist.

Bi sedan şêniyên bajarê Hesekê û gundewarên wê tevî malbatên şehîdan û zarokên wan, gelek fermandarên Hêzên Sûriya Demokratîk (QSD), Meclisa Leşkerî ya Hesekê û endamên Meclisa Malbatên Şehîdan di merasîma bîranînê de amade bûn.

Di merasîmê de endama Meclisa Malbatên Şehîdan Bera El Salih axivî û wiha got: "Em li ber wan fedalariyên şehîdan ditewînin ku di rêya azadiya gelê xwe û jiyana bi rûmet de û ji bo em di aramî û ewlehiyê de bijîn, kirine."

Bera El Saleh herwiha got: "Em teslîmkariyê qebûl nakin û serî xwe ji kesekî re natewînin. Em ê li ber xwe bidin û rêya şehîan bişopînin da ku vî welatî biparêzin û serkeftinê pêk bînin."

Ji fermandarên Meclisa Leşkerî ya Hesekê Remezan Hesekê axivî û sersaxî ji malbatên şehîdan re xwest û got: Hîna jî dagirkeriya Tirk êrişî çiyayên Kurdistanê dike û çekên giran û yên qedexekirî bi kar tîne. Di heman demê de Bakur û Rojhilatê Sûriyê û gelê Bakurê Kurdistanê dike hedef."

Remezan Hesekê her wiha got: "Armanca dewleta Tirk a dagirker ew e ku vîna gelan tune bike, desthilatdariya xwe ferz bike û li ser hesabê gelan Osmaniya nû vejîne. Ji ber wê PDK`ê li Başûrê Kurdistanê û ajan û sîxuran li Bakur û Rojhilatê Sûriyê bi kar tîne."

Fermandar Remezan Hesekê helwestên piştevanên dagirkeriya Tirk şermezar kirin ku ji bo berjewendiyên xwe pê re didin û distînin û wiha domand: Di serî de aliyên kurd, ajan û sîxur. Gelek şerm e ku kesek li dijî xelkê xwe destê xwe bide dijmin."

Remezan Hesekê soza tolhildana şehîdan, berdewamkirina têkoşîn û berxwedana li hemberî êrişên dewleta Tirk a dagirker û hevkarên wê û şopandina rêya şehîdan heya serkeftinê da.

Merasîma bîranînê bi pêşandana sînevîzyonekê têkildarî berxwedana HPG`ê li Herêmên Parastinê yên Medyayê, QSD û wêneyên şehîdên meha Tebaxê bi dawî bû.

(hs)

ANHA