Meclisa Herêma Rojava ya Dêrazorê konê sersaxiyê ji bo şehîd Ferhad Şiblî vegirt

Bi sedan şêniyên Dêrazorê û endamên saziyên sivîl, leşkerî û rûspiyên herêmê tev li merasîma sersaxiyê bûn. konê sersaxiyê li qada meclisê li bajarokê Kesra yê rojavayê Dêrazorê hatiye vegirtin.

Di merasîma sersaxiyê de, endamê Komîteya Perwerde û Fêrkirinê Mihemed El-Ebdullah axivî û got: “Divê em ji bo parastina welat, gel û rûmeta xwe li dijî van êriş û gefan xwedî helwest bin.”

Mihemed El-Ebdullah bang li gelê Sûriyê kir ku li kêleka QSD’ê, li dijî dagirkeriya Osmanî ya ku hovantirîn cureyên şer li dijî gelê me dide meşandin bisekinin.

El-Ebdullah wiha domand: “Tu cudahî di navbera Ereb, Kurd, leşker û sivîlan de tune ye. Em ji vir bêdengiya civata navneteweyî ya li hember sûcdarê hov bi tundî şermezar dikin.”

Her wiha El-Ebdullah bang li civata navneteweyî û rêxistinên mafên mirovan kir ku sûcên sûcdarê hov Erdogan rawestînin.

El-Ebdullah ev li gotinên xwe zêde kir: “Erdogan siyaseta tirkkirin û guhertina demografiyê dide meşandin, ji ber wê jî divê em xwedî li xwîna şehîdan derkevin û li ser şopa wan bin ji bo pêkanîna aramiyê li herêmê.”

Di dawiya axaftina xwe de El-Ebdullah wiha anî ziman: “Em ê heta pêkanîna azadî û serkeftinê ji bo hemû pêkhateyên herêmê li ser şopa şehîdan bin.”

Girêdayî mijarê, endamê Saziya Karûbarên Olî ya Herêma Rojava Ebdulmutî El-Xelîl wiha anî ziman: “Şehîd çirayên rêya me ne, em hêvîdar in kesên xwedî rêgez û armanc, wan biparêzin û dev jê bernedin.”

El-Xelîl axaftina xwe wiha domand: “Em Sûriya, pêşerojê ne û banga pêkanîna Sûriyaya pêşerojê dikin. Hemû kesên li Sûriyê, ewladên wê ne, yên ji bo welat û civaka xwe canê xwe feda dikin jî, şehîd in.”

Di dawiya axaftina xwe de El-Xelîl sersaxî ji malbata şehîd Ferhad Şiblî û tevahiya gelên Bakur û Rojhilatê Sûriyê re xwest.

(mh)

 ANHA