Belgefîlma Nûjiyan cara yekemîn li Rojava hate pêşandan

Tevgera Hîlala Zêrîn bi koordîneya Şîrketa Nûjiyan a Hilberandinê, belgefîlma Nûjiyan li hola Serdem a Hesekê pêşenda. Belgefîlm li ser jiyana têkoşer û rojnameger Nûjiyan Erhan e û cara yekemîn li Bakur û Rojhilatê Sûriyê tê pêşandan.

Bi sedan şênî, nûnerên rêxistinên jinan û ciwan, nûnerên Rêveberiya Xweser a Bakur û Rojhilatê Sûriyê, saziyên civaka sivîl, Yekitiya Rewşenbîran, partî û kesayetên civakî tev li pêşandana belgefîlmê bûn.

Destpêkê derhênera belgefîlmê, Jînda Asîm axivî û bixîrhatina beşdaran kir. Jînda Asîm daxuyand ku tîmekê ji 3 jinan pêk tê, ev belgefîlm amade kiriye.

Jînda Asîm teqez kir ku armanca wan bîranîna şehîd Nûjiyan û hemû şehîdên azadiyê ye.

Nûjiyan di 3`yê Adara 2017`an de li bajarokê Xanesor ê Şengalê bi destê çeteyên "Leşkerên Roj" birîndar bû û di 22`yê Adarê de li nexweşxaneyeke Hesekê şehîd bû. Di 25`ê Adarê de li Şengalê hate veşartin.

Tuba Akîlmaz (Nûjiyan Erhan ) li bajarê Hilwan ê Ruha li Bakurê Kurdistanê ji dayîk bûye.

Di belgefîlmê de, kurtedîroka têkoşîna Nûjiyan li Şengalê, kiryarên hovane yên DAIŞ`ê li dijî êzidiyan, kurtejiyana wê ji Ruha heta çiyayên Kurdistanê, Mexmûr, Şengal û Rojava tên bibîrxistin.

Belgefîlm behsa rastiya jina şoreşger, civaka êzidî û kurdî û rastiya şer vedibêje.

Di belgefîlmê de, zaroktiya Nûjiyan û dîmenên birîndarbûna wê, dîmenên kesên ku nas dike, çîrokên jinên şoreşger û têkoşîna jinan di pêkanîna azadî û edaletê de hene.

Hêjeyî bibîrxistinê ye ku amadekariyên belgefîlmê sala 2019`an li Şengalê cihî ku çalakvan û rojnameger lê jiyaye dest pê kirin. Fîlm sala 2021`an bi dawî bû û cara yekemîn di 26`ê Gulana 2022`yan de li Şengalê hate pêşandan.

(şx)

ANHA