ANHA ji Merenazê de eniyên şer şopandin

Ajansa me cara yekemîn derbasî Merenaz bû û eniyên şer ên nêzî bajarê Ezaz ê dagirkirî, şopandin.

Bajarokê Merenaz dikeve ser rêya navneteweyî 214 ya digihîne rêya M5 anku rêya bazirganiyê ya gundewarên bakurê Helebê. Ew rê bajarê Dîlok ê Tirkiyê û bajarê Helebê bi hev girê dide, her wiha rêya ku bi navê Heleb – Efrîn jî bi hev ve girê dide.

Bajarokê Merenaz nêzî 1 kîlometre dikeve başûrê bajarê Ezazê û bi nêzî 5 kîlometreyan nêzî deriyê Bab Selamê ye. bi kîlometreyekê dûrî mezintirîn baregehên leşkerî ya dewlet Tirk a dagirker a li bakurê Helebê ye, bi 12 kîometreyan li rojhilatê Efrînê ye. Ji aliyê rojava ve gundên Qitmê, Malkiyê, Kefer Cenê û Mêremîn ên girêdayî navçeya Şera ya Efrîna dagirkirî hene.

Merenaz di Sibata 2016`an de piştî hemleya rizgarkirina herêmên Şehba ji aliyê Ceyş El-Siwar û Cebhet El-Ekrad ve hate rizgarkirin.

GIRÎNGIYA STRATEJÎK A BAJAROKÊ MERENAZ

Girîngiya bajarok di cihê wê yê stratejîk de ye ku dikeve ser rêya navneteweyî 214`an de ku bi rêya bazirganiyê tê naskirin û ew jî ber bi deriyê Bab El-Selame yê bi ser Tirkiyê ve  li bajarê Ezaz ê dagirkirî ve ye, her wiha bi 3 kîlometreyan ji aliyê başûrê balafirgeha Miniq a leşkerî heye.

Merenaz deriyê sereke ji Til Rifet û balafirgeha Miniq a leşkerî li bakurê herêmê ve ye, di balafirgehê de hêzên hikumeta Şamê û hêzên Rûsyayê bi cih bûne.

Artêşa Tirk a dagirker û çeteyên wê ji beriya çend salan ve hewl da derbasî bajarok bibin û dagir bikin. Armanca wan ji vê yekê ew e ku rêya navneteweyî ya bazirganiyê têxin bin serweriya xwe, Til Rifet û hin herêmên kantona Şehbayê dagir bikin, her wiha girîngtirîn herêmên pîşesazî yên bajarê Helebê bi xeteriyê re rûbirû bihêlin.

Artêşa Tirk a dagirker ji 2016`an ve ji mezintirîn baregeha xwe ya  li rex Nexweşxaneya Wetenî ya  Ezazê bi rêya tank, top û moşekan Merenaz û gundewarên kantona Şehbayê, navçeya Şera, nexasim Til Rifet hedef digire.

Ji ber topbarana dewleta Tirk a dagirker ji sedî 99 ji bajarok hatiye hilweşandin. Li gorî hêzên li herêmê balafirên bêmirov û keşfê her tim li ser herêmê digerin. Teknîka pêşketî di baregehên leşkerî de heye. Eniyên şer bi rêya kamereyên çavdêriyê û alavên GPS tên şopandin, her wiha çekên sabit mîna (eqrebe û sekvan) ku li ser germahiyê dixebitin danîne û hemû zindiyan dike hedef.

Di şopandina ANHA’yê de ku nêzî saetekê dom kir, bajarok bi çeka doçka hate hedefgirtin û balafirên keşfê li ser herêmê digerîn.

 (bx)

ANHA