Eşîrên Minbicê ji bo parastina xaka Sûriyê teqezî bi hevgirtinê kir

Piştî civîna eşîran a têkildarî gefên dewleta Tirk a dagirker ên li dijî herêmê, rûspiyên eşîrên Minbicê daxuyaniyek da. Şêxê eşîra El-Useydî Mihemed Elî El-Useydî daxuyanî li pêşiya avahiya Rêveberiya Sivîl a Demokratîk a Minbicê û bi beşdariya bi dehan rûspî û şêxên li Minbicê yên Ereb, Tirkmen û Kurd xwend.

Bi dehan rûspiyên eşîra "Demalxe, Benî Useydî, Ebû Sultan, Benî Seîd, Bobane û rûspiyên eşîrên Tirkmen, hevserokên Meclisa Rêveber a Rêveberiya Sivîl a Demokratîk Mihemed Xêr Şêxo û hevserokê Meclisa Qanûnsaz a Minbic Mihemed Elî El-Ebo tev li daxuyaniyê bûn.

Di daxuyaniyê de hate diyarkirin: "Dewleta Tirk a dagirker gelek caran hewl daye ewlehî û aramiya Sûriyê bi giştî û herêmên Bakur û Rojhilatê Sûriyê bi taybet têk bibe, lewma ava Firatê li ser bi milyonan sûrî qut kir û karesatên mirovî pêk anî.

Her wiha li herêmên dagirkirî yên bakurê Sûriyê avahiyên mêtingeriyê lê dike û penaberên ji hundir û başûrê Sûriyê yên li Tirkiyê ne bi darê zorê li wan avahiyan bi cih dike. Dewleta Tirk a dagirker bi van kiryaran hewl dide demografiyê biguhreîne û hevgirtina civakî jî têk bibe. Her wiha parçeyekî din ji xaka Sûriyê qut bike û bi ser projeya xwe ya mêtingeriyê ya faşîst ve bike.

Her wiha dem dem gefên dagirkeriyê li dijî Bakur û Rojhilatê Sûriyê dixwe, da ku herêmên me bê îstiqrar bihêle, lewma em şêx û rûspiyên eşîrên bajarê Minbicê û gundewarê wê li hev civiyan û em sûcên li dijî xaka me ya Sûriyê red dikin. Em teqez dikin ku ji bo parastina her bihustek axa Sûriyê em ê hevgirtî û yek bin.

Di dawiyê de em bang li civata navneteweyî dikin ku li hemberî van gefan bi erka xwe rabe."

(eh)

ANHA