Jinan pêngaveke berfireh a çandina daran dan destpêkirin

Li herêmên Bakur û Rojhilatê Sûriyê çalakiyên bi boneya 8'ê Adarê Roja Jinan a Cîhanê 23'yê Sibatê dest pê kirin. Di çarçoveya çalakiyan de îro pêngaveke berfireh a çandina daran hate destpêkirin.

DIRBÊSIYÊ

Pêngava çandina daran bi beşdarbûna endamên saziyên Rêveberiya Xweser li navçeya Dirbêsiyê ya girêdayî kantona Hesekê hate destpêkirin.

Dar li navenda Meclisa Malbatên Şehîdan, Akademiya Şehîd Berçem, Şitilgeha 8`ê Adarê û Saziya Avê hatin çandin. Her wiha dar li bajarokên navçeyê jî hatin çandin.

Ji bo Dirbêsiyê nêzî 2 hezar û 300 dar hatin veqetandin. Ji wan nêzî 700 dar hatine çandin. Tê payîn ku bi rêya komînan dar li malbatên şehîdan werin belavkirin.

TIL TEMIR

Girêdayî mijarê endamên saziyên sivîl ên navçeya Til Temirê dest bi pêngava çandina daran li deverên giştî kir. Dar li çerxerêya mezin, peyarên giştî û rêya Goristana Şehîdan hatin çandin.

'PÊNGAV PEYAMEK JI DEWLETA TIRK RE YE'

Hevseroka Şaredariya Gel a Til Temirê Ronaz Yûnis li ser armanca pêngavê got: "Ev ji ber girêdaya jin û xwezayê bi hev ve ye."

Her wiha destnîşan kir ku pêngava çandina peyamek ji dewleta Tirk re ye û wiha anî ziman: "Bajarê me di nava xetên şer de ye. Pêngava me peyamek ji dewleta Tirk û çeteyên wê re ye ku ew nikarin xebatên me rawestînin."

Ronaz Yûnis Roja Jinan a Cîhanê li tevahî jinên cîhanê pîroz kir û got ew ê şopdarên rêya têkoşîna jina azad bin.

HESEKÊ

Li bajarê Hesekê jî Nivîsgeha Jinan a Şaredariya Gel bi Koordînasyona Kongra Star dest bi çandina daran li Goristana Şehîd Dijwar kir.

Bi dehan endamên Nivîsgeha Jinan a Şaredariya Gel û Kongra Star a Hesekê bi hilgirtina daran û pankartên bi nivîsa "Bi hevre em şoreşa xwe biparêzin û xaka xwe rizgar bikin" û bi berzkirina diruşmeyên silavkirina berxwedana jinan berê xwe dan goristana Şehîd Dijwar a li gundê Dawidiyê. Jinan 100 dar li goristanê çandin.

Di vê derbarê de endama rêveber a Nivîsgeha Jin a Şaredariya Gel Reşa Remo Roja Jinan a Cîhanê li hemû jinên Bakur û Rojhilatê Sûriyê û jinên cîhanê pîroz kir.

Reşa Remo diyar kir ku di destpêka pêngavê de 100 dar li goristana Şehîdan hate  hatin çandin.

ŞEDADÊ

Komîteya Jin a Şaredariya Gel a Navçeya Şedadê jî dest bi pêngava çandina daran kir. Dar li  parkên giştî û qada navenda Kongra Star û peyaran hatin çandin.

Derbarê mijarê de Hevseroka Şaredariya Gel a Şedadê Yasmîn El-Hisên got bi boneya Roja Jinan a Cîhanê nêzî hezar dar hatin çandin.

Yasmîn El-Hisên 8'ê Adarê li tevahî jinên cîhanê nexasim dayikên şehîdan pîroz kir û got pêngava wan wefedariya ji jinên li herêmê re ye.

KOBANÊ

<iframe width="560" height="315" src="https://www.youtube.com/embed/-3MayiIfo7c" title="YouTube video player" frameborder="0" allow="accelerometer; autoplay; clipboard-write; encrypted-media; gyroscope; picture-in-picture" allowfullscreen></iframe>

Li bajarê Kobanê jî bi dehan zarok û mamosteyên Nivîsgeha Parastina Zarokan nêzî 19 şitlên daran çandin.

Tê payîn ku sibe ji zarokên astengdar re şahiya 8'ê Adarê were lidarxistin.

(bx)

ANHA