Ciwanên Efrînê li dijî êrişên dagirkeriyê meşek bi meşeleyan li dar xist

Li navçeya Fafînê ya Şehbayê, bi dehan endamên Tevgera Ciwanên Şoreşger a Sûriyê- Herêma Efrînê û Yekitiya Jinên Ciwan bi meşeke meşeleyî êrişa dewleta Tirk a  25'ê Kanûnê ya li ser Kobanê ku di encamê de 6 endamên tevgerê şehîd bûn, şeremzar kirin.

Meş ji pêşiya navenda Meclisa Kantona Şehbayê dest pê kir. Ciwanan wêneyên şehîdên komkujiya li Kobanê, wêneyên rêber Abdullah Ocalan, alên Yekitiya Jinên Ciwan û Tevgera Ciwanên Şoreşger a Sûriyê û pankartên "Ji bo tolhildana şehîdan, li dijî xiyanetê tê bikoşin û faşîzmê hilweşînin" û "Azadiya Rêber APO azadiya me ye" hildan. Her wiha bê navber diruşmeyên silavkirina berxwedana Kobanê û Efrînê, dilsoziya bi şehîdan re û şeremzarkirina dewleta Tirk berzkirin.

Meş li ber dibistana Ajokariyê ya li aliyê başûrê navçeyê rawestiya. Endamê Tevgera Ciwanên Şoreşger a Sûriyê- Efrîn, Ehmed Hesen axivî û got, êrişên dewleta Tirk a dagirker ên li ser Herêmên Parastinê yên Medyayê  ji êrşên li ser Zirgan, Til Rifet û Kobanê ne cûda ne. Armanca van êrişan qirkirina gelê Kurd û têkbirina projeya biratiya gelan e.

Hesen diyar kir ku li gel komkujiyên li dijî jin, zarok û xityar û wêrankirina malan, dewleta Tirk a dagirker bi balafirên bêmirov ên bçek ciwanan dike hedef û got: "Ji ber ku ciwan dînamîka şoreşê ne û bingeha berxwedana li dijî dagirkeriyê ne."

Ehmed Hesen di dawiyê de got, ew ê şopdarên rêya hevalên xwe yên şehîd bin, heta ku armancên wan pêk bînin.

Çalakî bi diruşmeyên silavkirina berxwedana Serdemê û berxwedana ciwanan bi dawî bû.

ANHA