Bi merasîmeke bi heybet cenazeyên 2 şehîdên Kobanê hatin veşartin- HATE NÛKIRIN

Bi hezaran şêniyên bajarê Kobanê, endamên saziyên sivîl û leşkerî, partiyên siyasî yên herêma Firatê û şêniyên ji  tevahiya Bakur û Rojhilatê Sûriyê bi merasîmeke girseyî cenazeyên şehîd Viyan Kobanê û Rojîn Ehmed Îsa li goristana Şehîd Dîcle ya Kobanê spartin axê. Her wiha Welat Yelmaz ê ku  berî demekê dema erka xwe bi cih dianî şehîd bûbû, hate bibîranîn.

Endamên Tevgera Ciwanên Şoreşger û Yekitiya Jinên Ciwan; Nûjiyan Ocalan, Viyan Kobanê, Rojîn Ehmed Îsa, Merhef Xelîl Îbrahîm û Welîd Mihemed Menle di êrişa balafireke bêmirov a dewleta Tirk a dagirker de li bajarê Kobanê şehîd bûbûn. Cenazeyên Merhef Xelîl Îbrahîm û Welîd Mihemed Menle duh êvarî li navçeya Eyn Îsayê hatin veşartin.

Endamê Koordînasyona Tevgera Ciwanên Şoreşger ên Sûriyê ya Bakur û Rojhilatê Sûriyê Tolhildan Zerdeşt axivî û got, dewleta Tirk hedefgirtina sivîl ji xwe re kiriye kar û sedema vê yekê bêdengiya navneteweyî ye. Tolhildan Zerdeşt diyar kir ku ew xwe naspêrin tu kesî, belê li dijî van êrişan ew ê xwe bispêrin ciwanên xwe.

Cîgirê hevserokatiya Meclisa Kantona Girê Spî ya dagikirî Sebrî Nibo axivî û got: "Dewleta Tirk a dagirker hewldana qirkirina gelê herêmê dike û bi rêya qirkirina bedenî û şerê derûnî şerê qirkirinê pêk tîne. Lê gelek tiştan paşguh dike wekî ku rêber Abdullah Ocalan dibêje, me ciwanan dest pê kir û em ê bi ciwanan bi ser bikevin."

Hevserokê Meclisa Malbatên Şehîdan a Herêma Firatê Eyşê Efendî got: "Li hemberî van êrişên li dijî me, em ê bê deng nemînin. Em serî ji tu kesî re natewînin û di şoreşa xwe ya ku me dest pê kiriye û em ê biserbikevin de, em li nîvê rê ne. Em xwediyên karwanê şehîdan e ku ji me re rêya azadiyê bi rihê xwe xêz kirine û em ê şopdarên rêya wan."

Piştî axaftin bi dawî bûn, Meclisa Malbatên Şehîdan nasnameya şehîdan xwend û radestî malbatên wan kirin.

 Cenazeyên Viyan Kobanê û Rojîn Ehmed Îsa hatin veşartin û cenazeyê şehîd Nûjiyan Ocalan ber bi Şehbayê ve hate şandin û wê li goristina Şehîdên Berxwedana Serdemê were veşartin.

(eh)

ANHA