Li herêma Cizîrê Cejna Noelê hate pîrozkirin

Piştî rojiya 25 rojan, suryanên ertoduks ên kantona Qamişlo Cejna Noelê pîroz kir. Di saetên sibê de suryanan berê xwe dan dêran da ku nimêj û niyazan bikin da ku hezkirin û aştî di navbera şêniyan de belav bibe.

Piştê nimêjê berê xwe dan şêniyên ku îsal xizmên wan jiyana xwe ji dest dane, sersaxî ji wan re xwestin, her wiha dêr û nivîsgehên partiya Yekitiya Suryanî hatin vekirin da ku  pêşwaziya pêkhateyan bikin.

Li navçeya Til Temir a kantona Hesekê jî bi hatina cejnê re û di demekê de ku êrişên artêşa Tirk a dagirker û çeteyên wê li ser Bakur û Rojhilatê Sûriyê û êrişên li ser gundewarên aşûriyan ên navçeya Til Temirê didomin dêr hatin vekirin.

Bi sedan aşûriyên navçeya Til Temir û gundewarên wê îro di saetên sibê de berê xwe dan dêra Meryem El-Ezra ya navenda navçeyê da ku cejna Noelê pîroz bikin.

Cejin bi lidarxistina rêûresmên olî yên taybet û pêxistina mûman hate pîrozkirin.

Sergon Yewnan ku ji Almaniyayê hatiye da ku cejnê li navçeya Til Temirê pîroz bike ji ANHA`yê re destnîşan kir ku cejnên Noelê li Bakur û Rojhilatê Sûriyê xwedî girîngiyeke taybete û wiha domand: "Cejin li Xabûr xwedî taybetmendiyeke mezintir e. Ji aliyê pêkhateyan ve tê pîrozkirin û ev jî nîşaneya yekitî û hevkariya hemû pîrozbahiyan de ye."

Sergon kêfxweşiya bi hatina cejnê eşkere kir û ev tişt anî ziman: "Yekitî sira hêzê ye. Ev yek ji dihêle ku em weke gelên herêmê li hember êrişan bisekinin û êrişên artêşa Tik a dagirker û çeteyên wê li ser herêmê dê werin têkbirin."

Mîrna Serkîs jî cejna Noelê li hemû gelên herêmê pîroz kir û banga aştiyê kir.

 (bx)

ANHA