Li Serêkaniyê krîza aborî girantir dibe

Dewleta Tirk a mêtinger û çeteyên wê di sala 2018'an de Efrîn û di sala 2019'an de Serêkaniyê û Girê Spî dagir kirin û li van herêman talaneke mezin kir.

Dewleta Tirk hemû çavkaniyên aborî yên Efrînê desteser kirin, bi deh hezaran darên zeytûnan birîn, rûnê zeytûnan talan kir û li bazarên cîhanê bi navê "malê Tirkan" firot.

Dewleta Tirk û çeteyên wê heman talan li Serêkaniyê û Girê Spî jî pêk anîn û par jî bi hezaran ton genimê herêmê desteser kir û şand Tirkiyê.

Li aliyê din dewleta dagirker malbatên çeteyan ên ji deverên cuda yên cîhanê li herêmê bi cih dike û zeviyên şêniyên li herêmê mane desteser bike, mal û milkê wan talan dike ku bi vê yekê hewl dide wan birçî bihêle û bide koçberkirin.

Di encama talana li Serêkaniyê de, bêkarî û pirsgirêkên aborî pir zêde bûne. Heta zarok jî neçar in bixebitin û li kolanan etariyê dikin.

Çavkaniyekî ji Serêkaniyê li ser krîza aborî ya li bajarê dagirkirî agahî da û ji ber ewlehiyê nexwest navê xwe eşkere bike. Çavkanî diyar kir ku ji ber bêkariya zêde û krîza aborî gel bi birçîbûnê re rû bi rû ye û got pirsgirêkên mezin ên aboriyê hene, jinên pîr û zarok neçar mane li kolanan etariyê bikin.  

Li ser krîza aborî ya li bajêr çavkanî ev agahî dan: "Mirov debara xwe ya rojane jî bi zehmetî dikin. Pîrejin û zarok jî ji bo ku destekê bidin malbatê û debara xwe ya rojane bikin, li kolanan etariyê dikin. Kar tune ye. Jinên pîr û zarok li kolanan nan difiroşin. Her wiha hejmara etaran roj bi roj zêdetir dibe. Pir zehmet e ku rojane nan bê peydakirin. Kesên ku hinekî derfetên wan hebin jî, hewl dide bi vî rengî debara xwe bike."

ANHA