Ebdulhemîd Hac Derwêş li Dirbêsiyê hate bibîranîn

Nûnerên partî, rêxistinên siyasî, kesayetên welatparêz û bi dehan şêniyan beşdarî merasîma bîranîna ku li goristana gundê Qermanê pêk hatiye, bûn.

Endamê nivîsgeha siyasî ya partiyê Omer Cefer bi navê Partiya Demoqratî ya Pêşverû li Sûriye axivî û got:" Ebdulhemîd Hac Derwêş bingeha yekemîn a tevgera kurdî û siyasî li Sûriye danî û rastî astengiyên mezin ji aliyê şaxên ewlehiyê ên Sûriye hat, lê belê wî îsrar dikir ku armancên xwe pêk bîne."

Omer Cefer soz da ku ew ê rêya Ebdulhemîd Hac Derwêş li gorî rêgezên ku diyar kirine, bişopînin.

Di merasîma de, Sekreterê Partiya Demokratîk a Çep li Sûriye Salih Gedo jî axivî û got, wefata Ebdulhemîd Hac Derwêş valahiyek mezin di têkoşîna siyasî ya kurdî li tevahî Sûriye de hîşt û bandor li têkoşîna Kurdistanî kir.

Salih Gedo destnîşan kir ku Ebdulhemîd jiyana xwe di oxira pêkanîna armancên kurdî de feda kir û bi Sûriyek serbixwe ku ewlehî û istîqrar lê hebe, xeyal dikir.

Hêjayî bibîrxistinê ye ku Ebdulhemîd Hac Derwêş di sala 1930'î de li gundê Qermane ya girêdayî navçeya Dirbêsiyê ya Hesekê ji dayik bûye û di 24'ê Cotmeha 2019'an de di encama kirîzeke dil de li nexweşxaneyeke Qamişlo jiyana xwe ji dest da.

Ebdulhemîd Hac Derwêş yek ji Damezirînerên Tevgera Siyasî ya Kurdî li Sûriyê bû û erkên girîng di gelek partî û rêxistinên siyasî de girtin, her wiha di dawiyê de bûbû sekreterê giştî yê Partiya Demoqratî ya Pêşverû ya Kurdî li Sûriye.

(dm)

ANHA