​​​​​​​‛Divê civaka êzidî hewl bide dengê xwe di parlamentoya Iraqê de derkeve’

Partiya Azadî û Demokrasiya Êzidiyan (PADÊ) xwe amade dike ku bi namzetê xwe Şêx Semîr Derwîş tev li hilbijartinan bibe, ew jî li gorî rêzê 32 ê daîreya 3 ya Şengalê.

Têkildarî vê yekê, êzidiyên kantona Efrînê yên koçberî Şehbayê bûne da zanîn ku divê bi tevahî şêweyan piştevaniya PADÊ’yê di parlamentoya Iraqê de were kirin û deng ji namzetê partiyê re were dayîn.

‛HÊZÊN HEGEMON HEWL DIDIN KURDÊN ÊZIDÎ QIR BIKIN Û DIVÊ PÊŞÎ LI SÛCÊN WAN WERIN GIRTIN’

Endamê rêveber ê Komîteya Têkiliyan a Yekitiya Êzidiyan a Kantona Efrînê Mistefa Nebo ji ajansa me re wiha got: "Piştî çeteyên DAIŞ’ê di planên mezinên xwe yên qirkirina kurdên êzidî de li Şengalê di 2014’an de bi bin ketin, her wiha rizgarkirina wê, avakirina rêveberiyê û yekîneyên parastinê, careke din çete hewl didin wan planan berdewam bikin. Ji lew re divê pêşî li planên wan were girtin û derbasî merheleyeke nû bibin. Ew jî bi rêya nûnertiya di parlamentoya Iraqê û parastina mafên wan de pêkan e."

‛CIVAKA ÊZIDÎ DIKARE XWE BI RÊ VE BIBE Û BIPARÊZE’

Nebo wiha got: "Civaka êzidî êdî li ser erdê bûye hêz û fikireyeke îdolojî û dikare xwe bi rê ve bibe. Divê êzidiyên li Başûrê Kurdistanê hewl bidin dengê wan di parlamentoya Iraqê de derkeve da ku bersiva hewldanên hêzên hegemonîk, bi taybet a Tirkiyê, ya qirkirina êzidiyan û dagirkirina Şengalê bidin."

‛WERGIRTINA DENIŞTEKÊ DI PARLAMENTOYA IRAQÊ DE DÊ JI CIVAKA ÊZIDÎ RE BIBE DESTKEFTIYEK’

Li aliyekî din jî endama Yekitiya Êzidiyan a Efrînê Arîvan Menan piştgiriya xwe ji namzetê PADÊ’yê re di hilbijartinên parlamentoya Iraqê de nîşan da û got ew ji bo misogeriya parastina mafên êzidiyan gaveke erênî ye.

Arîvan Menan wiha domand: "Wergirtina daniştekê di parlamentoya Iraqê de dê ji civaka êzidî re bibe destkeftiyek û êzidiyan ji fermanên dewleta Tirk biparêze, mîna di komkujiyên çeteyên DAIŞ’ê yên li dijî Şengalê di 2014’an de pêk hatiye."

Arîvan Menan wiha dawî li gotina xwe anî: "Ev merheleya ku em tê re derbas dibin ne wek a berê ye, divê civaka êzidî bi rêya hilbijartinên parlamentoya Iraqê xwe îsbat bike ku ew dikare xwe bi rê ve bibe û biparêze."

(fr)

ANHA