'Komîteya şopandinê dê balkişandina ser aloziya avê û çareseriyan dewam bike'

Endamê Komîteya Amadekar a Komxebata Avê ya Bakur û Rojhilatê Sûriyê, Welîd Çolî diyar kir ku komxebatê armanca xwe di ronîkirina binpêkirinên dewleta Tirk ên peymanên navneteweyî yên derbarê avê de pêk anî.

29 îlon, 2021 08:02

HESEKÊ- HINAR ÎBRAHÎM

Komxebata navneteweyî ya avê duh bi dawî bû. Ev komxebat ji aliyê Rêveberiya Herêmî û Hawîrdorê ya herêma Cizîrê, her wiha Zanîngeha Rojava û Navenda Lêkolînên Firatê ve, hatibûn organîzekirin.

Der barê xebatên komxebatê û encamên ku bi dest xistine, endamê komîteya amadekar, Welîd Çolî ji ajansa me re axivî.

Çolî di destpêka axaftina xwe de got: “Armanc ji lidarxistina komxebatê li herêmê, balkişandina ser rewşa avê li herêmên Bakur û Rojhilatê Sûriyê ye û azarên gel e. Ji ber wê girîng bû ku rêxistin û kesayetên navneteweyî û akademisyenên têkildarî avê û pisporên ekolojiya û xwezayê beşdarî komxebatê bibin.”

Çolî diyar kir ku girîngiya avê bi awayekî zanistî û peymanên navneteweyî yên têkidarî avê yên di navbera Sûriye-Iraq-Tirkiyê de, hatin şîrovekirin.

Her wiha Çolî destnîşan kir ku binpêkirina peymanên navneteweyî ji aliyê dewleta Tirk ve û azarên 5 milyon kesên li herêmê ya ji ber şerê avê, her wiha rêjeya ava çemê Firatê li gorî dema berê, hatine nîqaşkirin.

Çolî wiha dewam kir: “Her wiha hemû aliyên girêdayî avê û bandorên wê yên siyasî, aborî, civakî hatin nîqaşkirin. Beşdarên komxebatê gihaştin hejmareke encam û pêşniyaran.”

Çolî destnîşan kir ku li kêleka encam û pêşniyaran, di encama komxebatê de komîteyek hatiye avakirin da ku encam û pêşniyaran bi aliyên têkildar re bişopînin, da ku bikaribe aloziya ewlehiya avê li herêmê di aliyê siyasî û hiqûqî de çareser bike. Ew komîte wê ji rêxistinên navneteweyî, herêmî û saziyên civaka sivîl, akademisyen û pisporên ekolojî û avê pêk were.

Têkildarî astengiyên li pêş lidarxistina komxebatê derketine, Çolî wiha got: “Astengiya herî mezin dorpêça li ser herêmên Bakur û Rojhilatê Sûriyê ye. Ji ber dorpêçê û ji ber Koronayê bi dehan akademisyen û nûnerên rêxistinên navneteweyî û nûnerên Misir û Iraqê û rêxistinên din ên navneteweyî nikarîbûn bihatina herêmê û bi rêya ZOMM beşdarî komxebatê bûne.”

Endamê komîteya amadekar Welîd Çolî piştrast kir ku ruxmî van astangiyan jî, nêzî 100 rêxistinên navneteweyî û mirovî yên hundir û li derve beşdarî Komxebata Navneteweyî ya Avê ya Bakur û Rojhilatê Sûriyê bûn.

Çolî destnîşan kir ku armanca komxebatê ya balkişandina ser rewşa ewlehiya avê li Bakur û Rojhilatê Sûriyê û aloziya ji ber qutkirina avê ji aliyê Tirkiyê ve li herêmê derketiye. Her wiha Çolî diyar kir ku komxebatê karîbû ji rêxistinan re rewş û aloziya heyî şîrove bike, da ku ew ji aliyê xwe ve zextê li Tirkiyê bikin û ji bo rêgirtina li karesateke mirovî piştgiriya herêmê bikin.

ANHA