​​​​​​​Xebata komînal bingeha avakirin û pêşxistina civakê ye

Gelek sal di ser aloziya Sûriyê re derbas bûn, vê yekê bandor li Sûriyê bi giştî û li Bakur û Rojhilatê Sûriyê bi taybet kir. Buyerên ku ji Adara 2011`an ve li Sûriyê dest pê kirine, bi xwe re gelek talan û wêranî anî. Gelê Bakur û Rojhilatê Sûriyê karîbû bi Rêveberiya Xweser re bibe alîkar û nehêle ku ev wêranî li herêmê jî çêbibe.

Rêveberiya Xweser ku di 21`ê Kanûna 2014`an de li kantona Cizîrê hatiye avakirin sîstema komînan esas wergirt û dest bi projeyên rêxistinî û xizmetguzariyê kir. Piştî ku hate avakirin, tavilê dest bi xebatên xizmetguzarî, pêkanîna pêdiviyên civakê yên bingehîn wekî nan, av û kehrebeyê, kir. Her wiha gelek xebat ji bo gund û taxan pêşkêş kir. 

Li gundên navçeya Tirbespiyê modela rêveberiya Xweser a xebata civaka komînal di nava şêniyan de hate pêkanîn. Şênî bi hev re bûn alîkar û bi desteka Rêveberiya Xweser di zêdetirî 50 gundî de malên ji bo sersaxiyê ava kirin û di zêdetirî 10 gundan de stadên footbolê çêkirin.

Her wiha bi şaredariya gel re bûn alîkar û bi hev re xebata ziftkirina rêkan û kişandina kanalîzasyonê dan meşandin. Hinek gundan jî wekî gundê Beyandorê bi rêya komîteya xizmetê ya komînê miqdareke pere ji bo malbatên feqîr veqetandin.

Şêniyê navçeya Tirbespiyê yê bi navê Fesîh Hisên bal kişand ser girîngiya xebata komînal û diyar kir ku ew ê di pêkanîna rêgeza alîkariyê de berdewam bikin da ku xwe ji hemû  pirsgirêkên heyî xelas bikin û ji navçe û gundên xwe re xizmetê pêşkêş bikin.

Fesîh Hisên gelek nimûneyên proje û xizmetên ku bi saya xebata komînal pêk anîne, dan û got, şêniyên gundên Şîtka û Etbê alîkarî dane saziya kehrebê da ku pirsgirêka ku di encama bahoza dawî de li herêmê derketiye, çareser bikin. Ji bo wê di nava çend saetan de pirsgirêk çareser kirin û kehrebeya gundên xwe peyda kirin.

Hisên di dawiy axafina xwe de bang li civakê kir ku girîngiyê bidin jiyana koolektîv, da ku hemû pirsgirêkên xwe çareser bikin û projeyên xizmetguzarî û aborî bi pêş bixin.

Her wiha şêniyê gundê Şîtka, Kadar Hisên jî diyar kir ku ew bi saziyên Rêveberiya Xweser re bûne alîkar û bi hev re stada footbolê ya bi şev ava kirine.

Kadar Hisên piştrast kir ku piştî serkeftina wan di projeya yekemîn de ew hewl didin ku di dema pêş de parkekê û navendeke çand û hunerê li gundê xwe vekin. Kadar jî di dawiyê de bang li hemû şêniyên gund û taxan kir ku xebatê komînal bi pêş bixin.

ANHA

<iframe width="560" height="315" src="https://www.youtube.com/embed/-ID8mU7H-Cw" title="YouTube video player" frameborder="0" allow="accelerometer; autoplay; clipboard-write; encrypted-media; gyroscope; picture-in-picture" allowfullscreen></iframe>