Navenda Jineolojiyê ya Kobanê civînek  li ser xwekuştinê li dar xist

Di civîna ku li Akademiya Şehîd Şîlan a li Kobanê hatiye organîzekirin de, bi dehan endam û rêveberên saziyên Rêveberiya Xweser a Herêma Firatê amade bûn.

Civîn bi deqeyeke rêzgirtinê dest pê kir, dûvre endama Navenda Lêkolînan a Jineolojiya ya Kobanê Rîma Ehmed axivî û behsa armanca civînê, lêkolîn û serjmariya ku navendê li ser xwekuştin û sedemên wê yên li herêma Firatê bi taybet kir.

Rîma Ehmed wiha got: "Di lêkolînê de behsa sedemên xwekuştin û bandorên belavbûna wê li herêma Firatê, şîrovekirina rewşa civakê, girêdana di navbera şoreşa jin û bertekên dijber de hatin kirin, her wiha  nêrîna saziyan ên têkildarî dozên jinan û rewşên xwekuştinê li Kobanê hatin girtin."

Rîma Ehmed diyar kir ku ew hewl didin di lêkolîna xwe de çare û pêşniyarên ji bo bidawîkirina rewşên xwekuştin bibînin, destwerdanê li pirsgirêkên civakî yên jinan bikin, qanûnan aktîf bikin û girîngiyên bidin nirxên exlaqî yên civakê.

Li aliyekî din jî endama rêveber a Navenda Lêkolînan a Jineolojiya ya Herêma Firatê Denîz Firat destnîşan kir ku lêkolîna ku navnedê amade kiriye girîngiyê dide nêrînên civakê û jinan bi taybet ên herêma Firatê, her wiha li ser asta Bakur û Rojhilatê Sûriyê tê belavkirin.

Beşdaran li ser mijarê nêrînên xwe anîn ziman, girîngiya zêdekirina asta perwerdekirina civakê bi giştî, jin û ciwanan destnîşan kirin. Her wiha hate gotin, xwekuştin rêbazekî şerê taybet e ku dewletên dijber ji bo hilweşandina civakê bi kar tînin.

Beşdaran da zanîn ku divê tevahî karmendên di sazî, tevger û saziyên jinan de xwe bigihînin her malekê û tevahî çînên civakê perwerde bikin.

Ev civîn a yekemîn li herêma Firatê li dar dikeve, tê payîn rêzecivînên mîna vê li tevahî saziyên Rêveberiya Xweser û navçeyan werin organîzekirin.

(fr)

ANHA