Ciwanên Kobanê û Helebê: Em bi gerîla re ne

Artêşa Tirk a dagirker ji 23`yê Nîsanê ve bi armanca dagirkirin û qirkirinê êrişî Başûrê Kurdistanê dike. Her wiha çekên qedexekirî jî bi kar tîne. Li hemberî wan êrişan gerîla berxwedaneke destanî nîşan dide.

Duh bi şev jî dewleta Tirk a dagirker Wargeha Penaberan a Şehîd Rustem Cûdî ya Mexmûrê bombebaran kir. Li gorî dezgehên çapemeniyê di encamê de 3 sivîlan jiyana xwe ji dest da û 2 jî birîndar bûn.

Her wiha dewleta Tirk a dagirker û çeteyên wê duh bi şev gundên navçeya Şêrawayê bi dehan topan kirin hedef. Di encamê de zaroka bi navê Zeyneb Hisên Îbrahîm jiyana xwe ji dest da, bav û birayê wê jî birîndar bûn.

Têkildarî wê endamên Tevgera Ciwanên Şoreşger a Sûriyê û Yekitiya Jinên Ciwan li Qada Şehîd Egîd a bajarê Kobanê kom bûn û daxuyaniyek dan. Hevserokê Tevgera Ciwanên Şoreşger a Sûriyê ya herêma Firatê Mihemed Mehmûd daxuyanî xwend.

Di daxuyaniyê de êrişên dagirkeriyê yên Tirk ên li dijî herêmên Parastinê yên Medyayê Zap, Metîna, Avaşîn û Wargeha Şehîd Rustem Cûdî ya Mexmûrê hatin şermezarkirin.

Di daxuyaniyê de bal hate kişandin ser binkeftina dewleta Tirk a li Heftanînê û wiha hate domandin: "Dewleta Tirk li Heftanînê bi bin ket, êrişî Garê kir û li Garê jî bi bin ket êrişî Metîna û Avaşînê kir, piştre bi alîkariya malbata Berzanî Wargeha Mexmûrê bombebaran kir û êrişî pêşmergeyan kir."

Ciwanan gotin, malbata Berzanî xiyanetê li gelê Kurd dike û îdia dike ku gerîla êrişî pêşmergeyan kiriye.

Ciwanan di dawiya daxuyaniyê de piştgiriya xwe ji bo gerîlayan re nîşan dan.

HELEB

Li Helebê jî Yekitiya Jinên Ciwan a Helebê li pêşiya navenda xwe ya li beşa rojhilatê taxa Şêxmeqsûd daxuyaniyek da. Endama yekitiyê Nesrîn Cafer daxuyanî xwend.

Di daxuyaniya Yekitiya Jinên Ciwan a Helebê de wiha hat gotin: “Yekitiya Jinên Ciwan a Helebê êrişên dewleta Tirk a dagirker ên li dijî navçeya Şêrawayê ya Efrînê şermezar dike. Di du mehên dawîn de dewleta Tirk a faşîst êrişî Herêmên Parastinê yên Medyayê kir û êrişên wê heta niha berdewam in.“

Di berdewama daxuyaniyê de hat diyarkirin ku dewleta Tirk bi armanca têkbirina vîna gelan û tunekirina aborî û binesaziya herêmê van êrişan pêk tîne û di radeya yekemîn de rêber Abdullah Ocalan, gelê herêmê û biratiya gelan dike hedef.

Di daxuyaniyê de bal hat kişandin ser êrişa li dijî navçeyên Şêrawayê û wiha hat gotin: “Di topbarana li ser gundê Kilotê yê navçeya Şêrawayê de zaroka bi navê Zeyneb Hisên Îbrahîm şehîd bû. Wek rêxistineke ciwanan em soza şopandina rêya şehîdên didin.”

(şx)

ANHA