Bi çalakiyên hunerî sala nû pîroz kir

Pîrozbahî bi beşdarbûna bi dehan kesî li hola Çand û Hunerê ya Axîn Welat a navçeya Fafîn a kantona Şehbayê hate lidarxistin.

Hola pîrozbahiyê bi wêneyê şehîdan, wêneyên rêber Abdullah Ocalan û pankartên "Bi şikandina tecrîda li ser rêber Abdullah Ocalan û hevgirtina gelan em civakeke demokratîk û pêşketî mîsoger bikin" û "Şoşreşa Kurdistanê bingeha şoreşa Rojhilata Navîn e" hatibû xemilandin.

Pîrozbahî bi deqeyeke rêzgirtin dest pê kir. Piştre endamê rêveber ê Komîteya Çand û Hunerê ya Kantona Şehbayê Ebdulezîz Kûsa sala nû li tevahî pêkhateyên li kantona Şehbayê pîroz kir û hêvî kir ku sala nû bibe wesîleya aştî, ewlehî, rizgarkirina herêmên dagirkirî û vegera koçberan li warê xwe.

Piştre romanek li ser çêbûna gerdûnê, derketina gelên cîhanê, olan û cûdahiyan wan hate xwendin.

Endamê rêveber ê navenda çand û hunerê Ebdulezîz Kûsa stranên kurdî gotin. Her wiha Koma Birûsk dîlanên folklorî yên kurdî pêşkêş kirin û zaroka bi navê Diyana El-Hisên û endamê  Komîteay Çand û Hunerê Ehmed Selama helbest xwendin.

Piştre Koma Şehîd Dilşêr Kefer Nasih a pêkhateyê Ereb a Şehbayê dîlanên erebî pêşkêş kirin. Her wiha Koma Awazên Şehbayê stranên şoregerî gotin û koma Şehba ya Şanoyê şanoyek bi navê "Dara Payîzê" pêşkêş kir ku behsa aloziyê û koçberiyê dike.

Di dawiyê de Koma Şehîd Ciwan Kefer Naya stranên erebî gotin. Beşdaran li ber stranan govend gerandin.

ANHA