Komeleya Parêzvanên Reqayê hate avakirin

Kongrê li hola navenda çand û hunerê ya bajarê Reqayê bi beşdarbûna bi dehan birîndarên şer ên ji tevahî herêmên Bakur û Rojhilatê Sûriyê, şêx û rûspiyên Reqa, fermandarên QSD, YPJ, endamên Meclisa Malbatên Şehîdan, Partiya Pêşerojê ya Sûriyê û Rêveberiya Jinan hate lidarxistin.

Kongreya damezrîner bi deqeyeke rêzgirtin dest pê kir. Piştre ji fermandarên QSD'ê Heqî Kobanê axivî, lidarxistina kongreyê li birîndarên şer pîroz kir û teqez kir ku QSD'ê di aliyê madî û manewî de piştgiriya birînndarên şer dikin.

Kobanê rola şehîd û birîndaran a li hemberî dagirkeriya Tirk û çeteyên DAIŞ'ê destnîşan kir û diyar kir ku bi saya keda şehîd û birîndaran herêm ewle bûne.

Li ser navê şêx û rûspiyên eşîrên Reqayê Şêx Telal El-Sîbat kongrê pîroz kir û wiha got: "Bi navê xwe û navê şêx û rûspiyên Reqayê ez birîndaran silav dikim û ji wan re dibêjim em bi we re û em palpişta we ne."

Piştre peymanê pîrozbahiyê yên ji kongreyê re hatin şandin, hatin xwendin.

Endamê Meclisa Birîndarên Şer a Bakur û Rojhilatê Sûriyê Sîdar Botan analîza siyasî ya komeleyê xwend.

Botan destnîşan kir ku Tirkiyê bi hişmendiya netewperest ve girêdayî ye û hewl dide li ser hesabê pêkhateyên ku bi hezaran salan li herêmê dijîn, dest deyne ser herêmên Bakur û Rojhilatê Sûriyê û demografya wê biguhere.

Sîdar Botan, diyar kir ku Tirkiyê herêmên Girê Spî, Efrîn û Serêkaniyê dagir kirin û li djiî sivîlan sûcên dermirovî pêk anîn, lê dewletên cîhanê li hemberî van binpêkirinan bêdeng maye.

Botan, her wiha rêzikanameya komeleyê xwend û beşdaran jî derbarê bendên wê de nêrînên xwe anîn ziman. Piştre ji aliyê delegeyan ve hate erêkirin.

Kongrê bi hilbijartina 9 endamên rêveber ên Meclisa Komeleya Parêzvananê Reqayê yên ji birîndarên şer ên Reqayê bi dawî bû.

ANHA