Îran dê bi Iraqê re peymana hevkariya leşkerî îmze bike

Serokerkanê Îranê Mihemed Baqrî got welatê wî di zûtirîn demê de dê bi Iraqê re peymana "hevkariya leşkerî" mohr bike û di halê hazir de peyman di qonaxa xwe ya dawîn de ye. Serokerkan Baqrî piştrast kir ku hevkariya parastinê ya di navbera Îran û Iraqê de dê ewlehiya Iraqê baştir bike.

Li gorî rojnameya Şerq El-Ewsat diyar kir ev yek dema duh wezîrê parastinê yê Iraqê Cuma Înad Sadûn serdana Tehranê kir, pêk hat. Serdan di çarçoveya hevkariya dualî ya leşkerî, ewlehî û parastina sînor de, pêk hat. Di heman demê de rojnameyê bi bîr xist ku wezîrê Iraqê û şandeyeke leşkerî ku ji fermandarên hêzên deryayî, hewayî û parastina sivîl, fermandarên saziyên leşkerî û ewlehiya Iraqê pêk tê, çû Tehranê. 

Mihemed Baqrî destnîşan kir ku Îranê bi Iraqê re der barê şêwirmendiya kar û xebatan de, berfirehkirina têkiliyên bi vî awayî li hev kirine û dê li gorî pêwîstiyên herêmê tev bigerin.

Dema pêşwaziya wezîrê Iraqê kir, sekreterê giştî yê Konseya Bilind a Ewlekariya Neteweyî ya Îranê, Elî Şemxanî got hevkariya parastinê û ewlehiya Îranê û Iraqê li ser bingeha mîsogeriya ewlehî û aramiya her du welan hatiye mohrkirin û banga bilindkirina asta têkiliyan û parastina ewlehiya sînorên her du welatan kir.

(eh)