Ji bo pêşîlêgirtina şerekî navxweyî, KNK`ê bi seroka Parlamentoya Herêmê re civiya

Hevserokê Kongreya Netewî ya Kurdistanê (KNK) Ehmed Qeremus li bajarê Hewlêrê bi seroka parlamentoya Herêma Kurdistanê Rêwaz Feyeq re civiya.

14 mijdar, 2020 09:35

NAVENDA NÛÇEYAN

Piştî civînê, hevserokê KNK’ê Qeremus daxuyaniyek çapemeniyê da û diyar kir ku civîna wan gelek girîng bû. Ehmed Qeremus got ku seroka parlamentoyê piştgiriya xwe ya ji bo hewldanên KNK’ê dûbare kiriye û helwesta xwe ya dijî şerê navxweyî ji bo wan ragihandiye.

Hevserokê KNK’ê Ehmed Qeremus di berdewamiyê de got: “Şerê navxweyî nayê qebûl kirin, rewşa Başûrê Kurdistanê li ber çav e. Em ê di rojên bê de bi armanca yekdengiya dijî şerê navxweyî serdana partî û aliyên siyasî bikin.”

Piştî civînê di malpera parlamentoyê de daxuyaniyek nivîskî hate weşandin. Di daxuyaniyê hate diyarkirin ku seroka parlamentoyê di civînê de gotiye; “Niha Herêma Kurdistanê hemberî rewşek giran ya aborî û siyasî ye. Ji bo vê li gorî me diyalog, ji bo derbaskirina vê rewşê takane çareseriye. Em diyalogê dipejirînin û li gorî me divê ji bo şerek xwekujiyê çênebe û zemînê diyalogê li nav aliyên nakok bê sazkirin da ku çareseriyek çêbibe.”