Şer li Idlibê dijwartir dibe

Duh hêzên hikumeta Sûriyê herêmên çeteyên dewleta Tirk ên li Idlibê topbaran kirin. Her wiha ji duh ve şer rû dide.

9 tîrmeh, 2020 11:42

NAVENDA NÛÇEYAN

Navenda Çavdêriya Mafên Mirovan a Sûriyê (SOHR) diyar kir ku îro şer li eniyên herêma Fitêra ya başûrê Idlibê di navbera hêzên hikumeta Sûriyê û çeteyên dewleta Tirk de rû da.

Di heman demê de hêzên hikumeta Sûriyê herêmên Sifohên, Filêfil, Fitêra yên başûrê Idlibê û her wiha derdora deştê Xabê topbaran kirin.

SOHR`ê diyar kir ku duh hêzên hikumeta Sûriyê çeteyekî koma Cibha El-Weteniya li herêma Foca 46’an li gundewarên rojavayê Helebê hedef girt û ew kuşt, her wiha balafirên keşfê yên Rûsyayê li asîmanê herêmê geriyan.

LEŞKEREKÎ HIKUMETA SÛRIYÊ HATE KUŞTIN

Çeteyên dewleta Tirk jî baregehên hêzên hikumeta Sûriyê li Kefer Nubul a gundewarên başûrê Idlibê û gundê Şûrlîn ê çiyayê Şehşebo topbaran kirin. Endamake hêzên hikumeta Sûriyê jî bi sekvaniyê ji hêla çeteyên dewleta Tirk ve li eniya şer a Riweyhayê hate kuştin.