‘Dewleta Tirk rewşên cîhanê li dijî Kurdan bi kar tîne’

Komîteya Amedekar a Konferansa Neteweyî ya Jinên Kurd a Sêyemîn bang li civaka navneteweyî û hikumeta Iraqê û ya Herêma Kurdistanê kir ku li hemberî êrişên artêşa Tirk a dagirker bi berpirsyariya xwe rabin. Komîteyê got dewketa Tirk rewşên cîhanê ji bo xizmeta projeya xwe ya li dijî hebûna Kurdan bi kar tîne.

17 nîsan, 2020 10:09

NAVENDA NÛÇEYAN

Komîteyê bi daxuyaniyekê êrişên artêşa Tirk ên li dijî Wargeha Penaberan a Şehîd Rustem Cûdî (Mexmûr) şermezar kirin ku di encamê de 3 jin şehîd bûn.

Daxuyaniya Komîteya Amadekar a Konferansa Jinên Kurd wiha ye:

"Tevî rewşa giran a ji ber belavbûna pandemiya Koronavîrusê ku cîhan tê re derbas dibe û xetereya vê vîrusê li ser tevahî mirovahiyê, tevî têkoşîna cîhanî ya li dijî vîrusê, her wiha tevî banga sekreterê giştî yê NY`yê Antonio Guterres a agirbestê, dewleta faşîst hîn jî êrişên xwe berdewam dike û isbata vê yekê jî êrişên li dijî Wargeha Şehîd Rustem Cûdî ne ku bi balafiran êrişî wargehê kir û di encamê de 3 jin şehîd bûn. Cîhan tev dizane wargeh dorpêçkirî ye û di demeke wiha de ku Koronavîrus li Herêma Kurdistanê û Iraqê berbelav e, îmkanên tenduristiyê jî pir kêm in.

Em bang li civaka navneteweyî û hikumeta Iraqê, her wiha hikumeta Herêma Kurdistanê dikin ku li hemberî êrişên artêşa Tirk bi berpirsyariya xwe rabin, ji ber dewleta Tirk rewşa cîhanê û navneteweyî kesybaz dike û êrişî hebûna gelê Kurd dike.

Her wiha em bang li hikumeta herêma Kurdistanê dikin ku bi erka xwe ya mirovî rabe û li dijî êrişên kampa Mexmûrê bi yek helwest bin, bila kamp ji dorpêçê derkeve da ku gel li hemberî şewba vîrusê li ber xwe bide û li hemberî binpêkirinên dewleta Tirk bisekine û rêzê ji serweriya xaka Iraqê û başûrê Kurdistanê re bigire."

(eh)

ANHA