Ciwanên Efrînê komkujiya Til Rifetê şermezar kir

Yekitiya Jinên Ciwan a Herêma Efrînê da ku sûcên dewleta Tirk a dagirker şermezar bike, meşek bi xwepêşandana bi sedan ciwanan li dar xist.

Xwepêşandan li yarîgeha gundê Babinêsê yê girêdayî naveya Fafînê kom bûn û ji wir dest pê kir û li tevahî kolanên sereke yên gund geriya. Xwepêşandanan wêneyên şehîdên komkujiya Til Rifetê, alên Yekitiya Ciwanan û alên YPJ’ê di nava dirûşmên silavkirina berxwedana û şehîdan de hildan.

Li qada gund meş veguherî mîtîngê û deqeyeke rêz girtin. Piştre daxuyanî bi zimanê kurdî ji hêla endama Yekitiya Jinên Ciwan Rohat Sîdo ve hat xwendin.

Daxuyaniya Yekitiya Jinên Ciwan a Herêma Efrînê wiha ye:

"Êrişên li ser Bakur û Rojhilatê Sûriyê berdewama komploya li dijî rêber Abdullah Ocalan û dagirkirina xaka Sûriyê wek çawa li bajarê Efrînê kiriye û guhartina demografiya li Bakur û Rojhilatê Sûriyê ne. Her wiha jî ev êriş bi sedema vejandina çeteyên DAIŞ’ê li xaka Sûriyê ye nîşaneya qirkirin û koçberkirina gelan e."

Bi êrişên dewleta Tirk a dagirker re, zarok û mezin tên kuştin û komkujî li dijî sivîlan pêk tên. Her wiha jî komkujiya dawî ya ku dewleta Tirk a dagirker li bajarê Til Rifetê li dijî koçberên Efrînê yên ku ji berê hovîtiya dewleta Tirk û çeteyên girêdayî wê neçarî koçberiyê bûne, pêk aniye. Her wiha jî ev komkujî di nava bêdengiya navdewletî û rêxistinên hiqûqî de pêk tên ku bû sedema şehîdbûna 8 zarokan û 2’yên mezin."

Em wek endamên Yekitiya Jinên Ciwan, êrişên dewleta Tirk a dagirker ên hedefgirtina gelên daxwaza neteweya demokratîk dikin, şermezar dikin û divê bê lêpirsînkirin. Her wiha jî bang li rêxistinên hiqûq û yekitiyan dikin ku li hember van êrişên komkujî û qirkirina li dijî zarok û jinan de pêk tên, rawestin. Li dawiyê jî bi rihê Avesta, Barîn û Amarayan dê êrişên dewleta Tirk a dagirker û faşîst, têk bibin."

Piştî xwendina daxuyaniyê, zarokên Efrîn û endamên ciwanên Efrînê şanoya komkujiya Til Rifetê ya ku ji hêla dewleta Tirk a dagirker û çeteyên wê di 2’yê Kanûnê de pêk aniye, pêşkêş kir.

Meş bi dirûşmên şermezarkirina dewleta dagirker û silavkirina berxwedanê bi dawî bû.

(fr)

ANHA