Komên çete êrişeke dijwar li dijî hêzên rejîmê li Idlibê pêk anî

Navenda Çavdêriya Mafên Mirovan a Sûriyê ragihand ku komên çete yên girêdayî dewleta Tirk dest bi êrişeke dijber li ser herêmên ku hêzên rejîmê di van demên dawîn li bejahiyên başur-rojhilatê Idlibê pêş de hatine, kir.

Li gor navendê, şerê dijwar niha di navbera çeteyan ji aliyekî ve û hêzên rejîmê ji aliyekî dîtir ve li derdora Ecaz, Mişêrfa û Um Xelaxîl di nava topbaranên dijwar li herêmê de pêk hat.

Ji aliyekî din ve jî ajansa Spûtnîk got: "Komên terorîst ên çekdar ên çeteyên "Cebhet El-Nusra" û "Ecnad El-Qûqaz" êrişeke berfireh li ser nuqteyên hêzên rejîmê li derdora bajarokên Ecaz û Serca yên bejahiyên başur-rojhilatê Idlibê pêk anî."

Spûtnîkê li ser zimanê çavkaniyê meydanî yê hêzên rejîmê wiha ragihand: "Yekîneyên Artêşa Sûriyê bersiva êrişên nû yên komên terorîst li hember Ecaz û Serca yên başur-rojhilatê Idlibê da û çekdaran dest bi êrişa dijwar a roketan li herêmên di bin serweriya artêşê de kir."

Hêzên rejîmê bi piştevaniya asîmanî ya Rûsyayê êrişên xwe di rojên borî de li ser herêmên qaşo bê çek zêde kirin û pêşketinên meydanî li ser erdê pêk anîn.

(fr)