‘Biryara me şopandina rêya azadiyê ye’

Îro bi sedan şêniyên bajarê Helebê li bin konê sersaxiyê yê 7 şehîdên YPG`ê ku beşdarî Berxwedana Serdemê bûn û li dijî dagirkeriya Tirkiyê şehîd bûn, kom bûn.

Kon li qada navenda tenduristiyê ji aliyê Meclisa Malbatên Şehîdan hate vedan. Şehîdên ku merasîm ji wan re hatiye lidarxistin ev in: Ebdo Hemokan(Çekdar Qendîl), Mustefa Birîmo (Zagros), Kirîm Qoq (Bakur Heleb), Hemîd Îsa (Efrîn Kurdistan), Ebdulrehman Mihemed (Kawa Kefer Zêt), Menan Bakîr (Serdar Emanos) û Ebd El-Mihsin Şêxo (Cûdî Sipan).

Merasîma sersaxiyê bi deqeyeke rêzgirtinê û toraneke leşkerî ji aliyê şervanên YPG û YPJ`ê ve dest pê kir.

Li merasîmê Botan Andoq bi navê YPG`ê axivî û wiha got: "Şehîd namirin, ew di dil û mejiyê her ferdekî de dijîn."

Ji aliyê xwe ve, yek ji rêveberên TEV-DEM`ê Raperîn Heleb hemû şehîdên Berxwedana Serdemê û şehîdên meha Gulanê bi bîr anîn.

Bi navê Meclisa Malbatên Şehîdan jî endamê rêveber Nîdal Hec Hisên got: “Madem şehîd hene, rêya azadiyê jî vekirî ye. Şoreşa azadiyê bi 6 şoreşgeran dest pê kir û îro gihaşt milyonan. Di şoreşa Rojava de xwîna Kurd, Ereb û Suryanan kete nava hev. Ev jî nameyekê dide ku kes nikare pêkhateyên herêmê ji hev dûr bixe.”

Bavê şehîd Cûdî Sipan, Hoşeng Şêxo jî axivî û got: “Em der barê tawanên Tirkiyê û ferzkirina tecrîda li ser Rêberê Gelê Kurd Abdullah Ocalan û dagirkirina Efrînê de bê deng namînin.”

Piştî axaftin bi dawî bûn, wesîqetên her 7 şehîdan hatin xwendin û radestî malbatên wan hatin kirin.

Merasîm bi dirûşmên dilsoziya bi şehîdan re bi dawî bû.

(jo)

ANHA