Têkçûna Astanayê aloziya herêma “bêçek” gur dike û Erdoxan li pêşberî hevalên xwe yên kevn e

Rojnameyên Erebî vê hefteyê behsa gelek mijaran kirin. Jê encamên têkçûna Astana û nakokiyên li herêmên “bêçek”. Tevî wê jî rewşa Sûdan, Cezayirê û nakokiyên di navbera Erdogan û hevalên wî yên berê de.

El-Şerq El-Ewsat: Bi têkçûna Astanayê re avakirina destûrê vedigere Cinevê û nakokî vedigere Idlibê

Rojnameyên Erebî yên vê hefteyê behsa gelek mijarên girêdayî karûbarên Sûriyê kirin. Yek ji van mijaran jî têkçûna Astana û nakokiyên li Idlibê ye. Girêdayî mijarê rojnameya El-Şerq El-Ewsat got: "Piştî têkçûna Astanayê, bi vegera topbarana Rûsî, êrîşên opozîsyonê û dewriyên Tirkiyê li Idlibê re, xeta avakirina komîteya destûrî û çareseriya siyasî vedigere Cinevê.”

 El-Xelîc Îmaratî: Gurkirina Sûrî-Rûsî zemîna destwerdana Idlibê çêdike

Têkildarî rewşa Idlibê, rojnameya El-Xelîc Îmaratî got: “Duh artêşa Sûriyê bi destekdayîna balafirên Rûsyayê, operasyonên leşkerî li bejahiyên Idlibê û Hemayê berfireh kirin. Li gorî çavkaniyên ji opozosyona Sûriyê ev operasyon wekî zemîna destwerdana Idlibê ne. NY`yê jî ragihand ku bi destpêkirina gurkirina şer li herêmê, heta niha 140 hezar mirov ji meha Sibatê ji parêzgeha Idlibê koçber bûne.”

Rojnameyê got: “Çavdêriya Mafên Mirovan a Sûriyê jî ragihand ku hêzên rûsî alavên leşkerî û endizyarî, her wiha lojîstik anîn bejahiya rojava ya Hemayê. Hêzên hikumetê jî, hêzên xwe anîn bejahiya Hemayê ya nêzî bejahiya Idlibê. Ev yek nîşana operasyoneke berfireh a leşkerî ye.”

Şerq El-Ewset: “Dijwartirîn bombebaran li ser Idlibê û nîşanayên lihevkirina li ser “herêma ewle”

Têkildarî rewşa Sûriyê, rojnameya Şerq El-Ewset wiha nivîsand: “Duh hêzên rejîma Sûriyê bajarê Idlibê û bejahiya wê, herêmên hevpeymana Rûsya û Tirkiyê, bi derdora 160 bermîlên teqemeniyê û topan bombebaran kirin. Di heman demê de, Washington û Enqere li ser “herêma ewle” ya rojhilatê Firatê hindik maye ku bigihîjin lihevkirinê.”

El-Heyat: Lîderê DAIŞ`ê piştî 5 salan xuya kir û gefa şerekî giran xwar

Derbarê mijarê de rojnameyê wiha nivîsand: "Serokê rêxistina DAIŞ`ê Ebû Bekir El-Bexdadî ragihand ku çekdarên wî şerekî tunekirinê bi rê ve dibin û got ew ê tola kuştî û dîlên rêxistinê hilîne.

El-Quds El-Erebî: Nakokiya li ser nûnertiyê di navbera leşker û opozîsyonê de

El-Quds El-Erebî derbarê geşedanên li Sûdanê de wiha got: “Di gavekê de ji bo şikandina sarbûna têkiliyên di navbera Meclisa Leşkerî ya serwer li Sûdanê û hêzên opozîsyonê de, her du alî roja yekşemê li ser avakirina meclisek hevpar a ku ji sivîl û leşker pêk tê li hev kirin. Li gel wê jî danûstandinên girêdayî rêjeya nûnertiya her du aliyan di meclisê de berdewam in.”

El-Şerq El-Ewsat: Dûrxistina malbata Buteflîqa ji qesrê

Derbarê rewşa Cezayîrê rojnameya Şerq El-Ewset got: "Çavkaniyan eşkere kir ku malbata serokê Cezayîrê yê berê Ebdulezîz Buteflîqa, ji navenda serokatî ya li rojavayê paytextê derketiye. Ew yek jî li ser fermana ji hikumeta leşkerî ku di 2`yê Nîsanê de piştî ketina Buteflîqa hatiye aktîfkirin, pêk hat."

El-Ereb: Dawiya lîstokê: Washington Ixwan wek terorîstan disinifîne

Derbarê mijara xistina Îxwan El-Mislimîn di lîsteya rêxistinên terorê de, rojnameya El-Ereb wiha got: "Rêveberiya serokê Dewletên Yekbûyî yên Amerîkayê (DYA) Donald Trump dixebite da ku koma Îxwan El-Mislimîn wek rêxistineke terorê diyar bike. Çavdêr jî dibînin ku ev gav encama daxwaza hêzên herêmî û navneteweyî ji tunekirina hêzên radîkal e.”

El-Şerq El-Ewsat: Hevalên Erdogan ên berê niha dijminên wî yên nû ne

Rojnameya Şerq El-Ewset derbarê rewşa Tirkiyê de wiha got: "Serokê Tirkiyê Recep Tayyîp Erdogan rastî dijminên nû tê. Ew jî hevalên wî yên berê di rêveberiya partiya AKP`ê de bûn. Ev dijberî jî bû sedem ku di hilbijartinên şaredariyan de bajarên mezin ji dest bide."

El-Şerq El-Ewsat: Aloziya Venzuelayê derbasî pêvajoyeke nû bû

Têkildarî rewşa Venzuelayê rojnameya Şerq El-Ewset wiha got: "Şevê din aloziya Venzuelayê derbasî pêvajoyeke nû bû. Di heman demê de di navbera leşkerên opozîyona Juan Guaido û leşkerên serokê Nicholas Maduro de li derveyî baregeha leşkerî li paytexta Caracas rû da."

(şx)

ANHA