Akademiya Şehîd Elî Milhim dewreya xwe ya 34’an bi dawî kir

Akademiya Şehîd Elî Milhim a Hêzên Ewlekariya Hundirîn a Herêma Tebqayê, dewreya 34`emîn a bi navê Dewreya Şehîd Wail Ilêwî bi merasîmekê bi dawî kir.

NÛÇE

3 gulan, 2019 11:30

TEBQA

Dewreya Şehîd Wail Ilêwî ku mehekê dewam kir, waneyên bîrdozî û leşkerî tê de hatin dayîn. Di destpêka merasîma bidawîkirina dewreyê de, endamên ku perwerdeya xwe bi dawî kirine, derbasî qada akademiyê bûn û deqeyekê rêz girt.

Piştre hevserokê Meclisa Rêveber a Tebqayê Şiyar Mihemed axivî, bixêrhatina beşdaran kir û hemû şehîd bi bîr anîn.

Hevseroka Komîteya Hundirîn a Tebqayê Betol Mihemed jî axivî û spasiya rêveberiya akademiyê ji bo perwerdekirina endaman kir û hêvî kir ku endamên derçûyî tiştên standine di pratîkê de pêk bînin.

Birayê şehîd Wail, Mihemed Ilêwî jî di merasîmê de axivî û hêvî kir ku kesên perwerde bi dawî kirin, berdêlên şehîdan ji bîr nekin û li ser xeta wan bimeşin.

Her wiha ji rêveberên akademiyê, Îmad Betûşî jî axivî û got armanca ji vê dewreyê ew e ku hemû fikr bibin yek û ferasetên şaş ku DAIŞ û rejîmê di mêjiyê ciwanan de çandibûn, werin sererastkirin. Piştî axaftinan, bawername li endaman hatin belavkirin û wêneyê şehîd Wail Ilêwî diyarî malbatê hate kirin.

Merasîm bi gerandina govendê bi dawî bû.

(kc)

ANHA