Li Amûdê pîrozbahiya serkeftina QSD’ê

QAMIŞLO

Piştî ragihandina fermî ya serkeftina QSD`ê ya li dijî  DAIŞ`ê li tevahiya herêmên Bakur û Rojhilatê Sûriyê şahî hatin lidarxistin.

Têkildarî mijarê YPG/YPJ û Hêzên Xweparastinê îro li Goristanan Şehîd Ismaîl a navçeya Amûdê torenek leşkerî li dar xistin. Malbatên şehîdan û şêniyên navçeyê jî beşdarî torena leşkerî bûn. Piştî torenê şahiyek hat lidarxistin.

Yek ji fermendarên YPG`ê Rûbar Dêrik di torenê de axivî. Rûbar Dêrik destnîşan kir ku ev 5 salin QSD bi armanca têkbirina DAIŞ’ê têdikoşe û wiha got: “Çeteyan hewl dan tevna herêmê parçe bikin. Li her derê ku bi cih bûn nebaşî, kuştin û wêrankirinê belav kirin.”

Rûbar Dêrik gotinên xwe wiha berdewam kir: “YPG/YPJ’ê  û QSD`ê piştî 5 salan bi saya fedakariyên mezin, DAIŞ`ê têk bir. Gelên Bakur û Rojhilatê Sûriyê bi tevahiya pêkhateyên xwe ve li rex şervanan sekinîn.”

Piştre şervanan bi meşa leşkerî ber bi hola Seyran ve meşiyan. Şervanan dirûşmeyên dilsoziya bi şehîdan re û silavkirina berxwedana Rêberê Gelê Kurd Abdullah Ocalan berz kirin.

Hola Seyran a ku bi wêneyên Rêberê Gelê Kurd Abdullah Ocalan, şehîdan û alên YPG, YPJ, QSD, Meclisa Malbatên Şehîdan, al û sembolên şoreşa Rojava hatibû xemilandin. Şervanan bi coşek mezin şênî pêşwazî kirin.

Li wir şahiyek hat lidarxistin. Di şahiyê de endamê Meclisa Malbatên Şehîdan Ziyor Elî û hevserokê Meclisa navçeya Amûdê Abdullah Ehmed axivîn. Axêveran serkeftina QSD`ê li beşdaran, şervanan û tevahiya gelê Bakur û Rojhilatê Sûriyê pîroz kirin.

Piştî bidawîbûna axaftinan hunermend Sefqan Orkêş strana xwe ya nû diyarî şervanan kir û endamên Navenda Çand û Hunerê ya navçeyê stranên şoreşgerî stran.

(şx)

ANHA