Êzidiyên rizgarkirî ber bi Şengalê ve ketin rê

QAMIŞLO

Hêzên Sûriya Demokratîk (QSD) di pêngava Bagera Cizîrê ji bo rizgarkirina Dêrazorê, bi sedan malabtên êzidî ji çeteyên DAIŞ`ê rizgar kirin û radestî Mala Êzidiyan a Herêma Cizîrê kirin, wan jî radestî Meclisa Sivîl a Şengalê kirin.

Mala Êzidiyan îro 9 zarok û jinek radestî Meclisa Şengalê ya Mala Êzidiyan a li navçeya Amûdê kirin. Navê hinek ji wan kesên ji destê DAIŞ’ê hatine rizgarkirin wiha ne: Canê Ilyas Xelef û 3`ê zarokên wê Ferîd, Ehmed û Ferîde, ji gundê Til Benat ê Şengalê ne, hevjînê wê ji aliyê çeteyên DAIŞ`ê hatiye kuştin. Zarokên bi navên Celîl Xelîl Beşar, Eymen Ferhan, Colîn Elaa û Sûad Reşo.

Di civîna çapemeniyê de ku li Mala Êzidiyan a Herêma Cizîrê hate lidarxistin, serokê Mala Êzidiyan Ziyad Şêx axivî û wiha got: "QSD, YPG û YPJ`ê kedeke mezin da û êzidiyên ku hatibûn revandin, rizgar kirin. Em jî wek endamên rêveberiyê û endamên Mala Êzidiyan spasiya hêzan dikin. Em ê jî wan radestî Meclisa Şengalê bikin da ku wan bigihînin malbatên wan."

Ziyad Şêx serkeftinên QSD’ê pîroz kirin û wiha got: "Em vê berxwedanê pîroz dikin û hêvî dikin ku ev pêngav bi serkeftî bi dawî bibe."

Her wiha yek ji fermandarên QSD`ê Berxwedan Amûdê axivî û wiha got: "Yekîneyên Parastina Jin (YPJ) di pêngava Şerê Tunekirina Terorê de soz da ku ew ê tola jin û zarokên êzidî yên ji aliyê çeteyên DAIŞ`ê ve hatine revandin, rakin. Îro jî ev yek di pêngava Bagera Cizîrê de îsbat bû û êzidî rizgar kirin. Em jî wek QSD`ê me ew radestî Mala Êzidiyan a Herêma Cizîrê ya li navçeya Amûdê kir da ku wan bişînin Şengalê."

Canê Ilyas Xelef, jina ku ji aliyê QSD`ê hate rizgarkirin, ji ajansa me re behsa êşa ku di dema revandina wan de dîtine, kir û wiha got: "Dema ku çeteyên DAIŞ`ê êrîşî Şengalê û gundê me kir, jin û zarok revandin, mêr jî kuştin û serê wan jê kirin. Hevjînê min jî kuştin. Em spasiya QSD’ê dikin ku em ji çeteyên DAIŞ’ê rizgar kirin û radestî Mala Êzidiyan a Herêma Cizîrê kirin.”

Piştî ku civîna çapemeniyê bi dawî bû, endamên rêveberiyê û endamên Mala Êzidiyan tevî êzidiyên ku hatine rizgarkirin, berê xwe da Şengalê da ku wan radestî Meclisa Sivîl a Şengalê bikin ku bişînin gel malbatên wan.

(jo/bm)

ANHA