Li Şehbayê şahiya Roja Cîhanî ya Zarokan

ŞEHBA

Bi boneya Roja Cîhanî ya Zarokan Komîteya Desteka Dirûnî bi hevkariya Komîteya Perwerdeya Civaka Demokratîk û Tevgera Çand û Hunerê îro şahiyek li dibistana navçeya Ehdas li dar xist.

Bi sedan zarokên Efrînê, endamên rêveber ên Heyva Sor a Kurd, Komîteya Perwerdeya Civaka Demokratîk û Tevgera Çand û Hunerê amade bûn.

Zarokan pankartên bi nivîsa 'Mafê min e bi tenduristiyek baş jiyan bikim', ‘Mafê min e ez bilîzim', 'Mafê min e ez di nav ewlehiyê de bim' û ' Mafê min e hûn guhdarî min bikin' hildan.

Şahî bi deqeyek rêzgirtin destpê kir. Piştre axaftin ji hêla hevserokê Heyva Sor a Kurd Ekrem Ereb, hevserokê Perwerdeya Civaka Demokratîk ê Efrînê Hamid Rustem, endama Kevana Zêrîn a girêdayî Tevgera Çand û Hunerê Ronahî Şêxo û xwendekerek dibistana amadehî Rêzgar Hemo ve hatin kirin.

Di axaftinan de hate destnîşankirin ku zarok bûne qurbaniyên şer û suca herî mezin ew e ku zarok ji mafên xwe bê par bimînin.

Her wiha di axaftinan de hate tekezkirin ku li şûna ku zarok stranên kêfxweşiyê bistêrin û behsa hêviyên xwe bikin behsa şer, wêrankirin, balafir û topbaranê dikin.

Axaftvana diyar kirin ku zarokên Sûriyê bi giştî û bi taybet zarokê Efrînê û tama êrîşan tam kirin û ji mafên xwe yên herî besît bêpar man. Niha jî di bin navê 'Zarokên Koçber' jiyan dikin.

Piştî bidawîbûna axaftinan Koma Şehîd Berxwedan a zarokan a girêdayî Tevgera Çand û Hunerê dîlanên filklorî pêşkêş kirin. Piştre endamên Heyva Sor a Kurd şanoyek girêdayî êrîşên artêşa Tirk a dagirker û çeteyên girêdayî wê li dijî Efrînê û derketina zarokan ji bajêr pêşkêş kirin.

Paşê Koma Şehîd Hêva ya girêdayî Tevgera Çand û Hunerê stranên şoreşgerî pêşkêş kirin. Beşdarên şahiyê û zarokan jî xelekên govendê derandin.

Hêjayî bibîrxistinê ye ku bi boneya Roja Zaroka a Cîhanî li navçeya Fafînê sibe wê çalakî bên lidarxistin.

(şx)

ANHA