Şandeya jinên Kurdistanê serdana Minbicê dike

MINBIC- Şandeya jinên Kurdistanê ya ku bi armanca piştgirdayîna ‘Berxwedana Serdemê’ ya Efrînê  hatiye Rojava serdana Minbicê dike.

Endamên şandeyê li avahiya Meclîsa Jin a Minbicê ji aliyê Hevseroka Meclîsa Rêveber a Minbicê Zeyneb Qenber, Berdevka Meclîsa Jin a Minbicê û gundewarên wê Meha El-Elî, Hevseroka Komîteya Jin a Rêveberiya Sivîl a Demokratîk a Minbic û gundewarên wê Întîsar Mihemed  û endamên Mal Jin û Meclîsa Jinê ve hatin pêşwazîkirin.

Di sedanê de, rewşa jinên Minbicê ji dema ji DAIŞ‘ê rizgar bûne, pêşketinên ku di her qadan de, civakî, çandî, rêxistinî, siyasî û leşkerî bi dest xistine, hatin nîqaşkirin.

Endamên şandeyê tekez kirin ku wan di kesayeta jinên Bakurê Sûriyê bi giştî û Rojavayê Kurdistanê bi taybetî de pêşketin dîtin û gotin ku ew di wê baweriyê de ne ku jinên li Bakurê Sûriyê serkeftinên mezin bidest xistine û wê ji hemû jinên Rojhilata Navîn re bibin pêşeng.

Şandeyê paşê, serdana Rêveberiya Sivîl a Demokratîk a Minbicê û gundewarên wê kir, li vir jî ji aliyê Hevseroka Meclîsa Zagonsaz a Rêveberiya Sivîl a Demokratîk a Minbic û gundewarên wê Nezîfe Xelo, Hevseroka Rêveberiya Komînên Xeta gundewarên Minbicê Ezab El-Ebûd ve hate pêşwazîkirin, di serdanê de, mekanîzmeya rêxistinkirina jin di nava komîn û meclîsan de hatin nîqaşkirin.

Endamên şandeyê her wiha serdana akademiyên jinan, deverên dîrokî û mezara şehîdên Minbicê kirin.

Şande di rojên pêş de dê biçin Efrînê.

(bb)

ANHA