Şêniyên kantona Cizîrê 3 şehîd oxir kirin

Şêniyên navçeya Dêrikê şehîd Cabir El Ebo, Dilovan Çilaxa û fermandara Federasyona Gaziyên Şer Azadî Dêrik oxir kirin.

ROJANE

13 sibat, 2024 14:53

QAMIŞLO

Bi sedan şênî, endamên saziyên sivîl, leşkerî, rûspiyên bajarê û navçeyên kantona Cizîrê çûn navçeya Dêrikê û ji cenazeyên şehîdan ji nexweşxaneya Şehîd Hogir a li Dêrikê wergirtin.

Girseya gel bi karwanekî wesayîtan ber bi Goristana Şehîdan Xebat Dêrik ve ketin rê.

Li goristanê endama Meclisa Malbatên Şehîdan a Girkê Legê Gulistan Osman axivî û got: "Şehîd Azadî Dêrik ji bo armancên şehîdan pêk were, di nava têkoşînê û berxwedanê de bû. Şehîd Cabir û Dilovan di oxira azadiyê de canê xwe feda kirin."

Endamê Federasyona Gaziyên Şer Laleş Zinar jî got: "Ruxmî êrişan lê têkoşîna me ji bo azadiyê berdewam e."

Şervanê Meclisa Leşkerî ya Dêrikê Misleh Misleh jî soz da ku tola şehîdan hilînin.

Endamê rêveberiya Kongreya Îslama Demokratîk a Dêrikê Sînan Muhsên sersaxî da malbatên şehîdan.

Dûre wesîqeyên her sê şehîdan hatin xwendin û cenazeyên şehîd Azadî Dêrik û Cabir El Ebo li Goristana Şehîd Xebatê Dêrik hatin veşartin. Lê belê cenazeyê şehîd Dilovan Çilaxa dê li Goristana Şehîd Dilşêr a navçeya Tirbespiyêy a kantona Cizîrê bê oxirkirin.

(şx)

ANHA