Şaredariya Hesekê plansaziyeke nû danî

Şaredariya Gel a Hesekê plansaziyeke gistî ya îsal ragihand. Li gorî plansaziyê, binesazî û xetên kanalîzasyonê dê werin sererastkirin, rê dê werin qîrkirin û qada hêşîn were zêdekirin.

Têkildarî plansaziya îsal a xebatê, hevserokê Şaredariya Gel a Hesekê endazyar Macid Îsmaîl agahî dan ajansa me.

Macid Îsmaîl diyar kir ku şaredarî sererastkirin û qîrkirina hin kolanên sereke yên navenda bajar didomîne û got: "Di dema pêş de dê kolanên taxên başûrê bajar jî werin qîrkirin. Her wiha xebatên sererastkirina xetên kanalîzasyonê yên bizirar wekî taxên Xişman û Zihûr dê bidomîne."

Îsmaîl anî ziman ku proje li ser daxwazên ku ji komînan hatine pêk tên û ev tişt diyar kir: "Destpêkê daxwaz ji komînan tên. Komîteyên pispor ên şaredariyê daxwazan di aliyê meydanî de dinirxînin û li gorî wê projeyan pêk tînin."

ÇARGOŞEYA EWLEHIYÊ

Îsamîl bal kişand ser çargoşeya ewlehiyê ku piştî rûxandina rejîma Baasê ket bin kontrola Rêveberiya Xweser û wiha got: "Pêdiviya vê deverê di aliyê sererastkirina parkan, çandina daran û sererastkirina naverêyan de bi sererastkirinê heye. Pêdiviya kanalîzasyonê jî bi sererastkirinê heye.”

ZÊDEKIRINA QADA HÊŞÎN Û ÇARESERKIRINA BINPÊKIRINAN

Şaredariya Hesekê ku ji bo nûjenkirina parkên giştî dixebite, parkan bi mîqdarên sembolîk dide hin veberhêneran da ku ji nû ve rast bikin û biparêzin. Îsmaîl destnîşan kir ku şaredarî li dijî destdirêjiyên li ser daran û milkê giştî dê tedbîrên tund bigire û got "kesên ku binpêkirinan bikin dê li gorî qanûnê hesab bidin."

Der barê rexneyên kombûna çopê li hin taxan de, Îsamîl da zanîn ku alavên komkirina çopê kêm in û wiha domand: “Şênî pabendî demên derxistina çopê nabin, ev jî pirsgirêka kombûna çopê zêdetir dike.”

Îsamîl bang li şêniyan kir ku ji bo hêsankirina karê şaredariyê û rêgirtina li ber qirêjiyê, bibin tevkar.

Macid Îsamîl anî ziman ku dê hejmara alavên paqijî û kanalîzasyonan zêde bikin, projeyên ronîkirin, qîrkirin û sererastkirina naverêyan berfireh bikin û got: "Şaredarî dê ji bo pêşxistina xizmetguzarî û pêkanîna plansaziyê îsal hemû hewldanan bike."

(bb)

ANHA