Şaredariya Hesekê lêborîn ji şêniyan xwest

Şaredariya Gel a Hesekê dest bi projeyên xwe yên xizmetguzariyê kiriye, rêyan zîft dike, ragar û torên kanalîzasyonê sererast dike. Rojane jî paqijiya giştî bajarê Hesekê paqij dike û çopê radike. 

Li kolan û taxên bajarê Hesekê çop gelekî li ser hev kom bûye û şênî gelekî ji vê yekê aciz bûne.

Rêveberiya Ofîsa Rêveber a Şaredariya Gel a Hesekê Silava Ehmed der barê pirsgirêkên xizmetguzariyê de ji ajansa me re axivî û got: "1`ê Gulanê me li Hesekê dest bi zîftkirine kir. Me ji kolanên giştî, yên herî zêde têne bikaranîn û gelek ziyan dîtine, dest pê kir. Heyanî niha şaredariyê li Hesekê 4 hezar metrekab zîft kiriye û kortên li ser rêyan girtine. Xebata zîftkirine hîna didome. Her wiha em torên kanalîzasyonê, ragaran sererast dikin û kolanan paqij dikin."

Silava Ehmed li ser navê şaredariyê lêborîn ji şêniyan xwest û wiha got: "Li kolanên bajar çop kom bûye, em lêborîna xwe ji şêniyan dixwazin. Li bajar çop gelekî kom dibe, alavên me yên paqijkirinê û madeyên sotemeniyê jî kêm in. Ji ber vê yekê çop zêde bûye. Em zehmetiyê dibînin û em dizanin ku kêmasî di xebatên me de hene. Ew jî ji ber madeyên sotemeniyê kêm in. Em niha hewl didin çopa zêde li ser hev kom bûye û rêyên sereke paqij bikin."

Silava Ehmed xwest madeyên sotemeniyê erzan bidin wan û got ew ê hejmara karkerên paqijkirinê zêde bikin û kesên çopê diavêjin, hesab ji wan bixwazin. Ji şêniyan jî xwest bi wan re bibin alîkar û çopê neavêjin kolanan.

(np)

ANHA