Li Qamişloyê panela ˋMîrasa me nasnameya me yeˋ

Desteya Çandê ya kantona Cizîrê paneleke diyalogê bi dirûşma "Mîrasa me nasnameya me ye" li bajarê Qamişloyê organîze kir. Di panelê de bi dehan kesayet, nûnerên sazî û rêxistinên têkidarî mîrasê, beşdar bûn.

Di panelê de 2 mijar hatin nîqaşkirin. Mijara mîrasa nemadî, veguhastina zanîn ji nifşên bê re, parastina wê û mijara zehmetiyên parastina mîrasa nemadî, çareserî û bikaranînên herêmî û navneteweyî der barê vê yekê de hatin nîqaşkirin.

Di serî de pisporê şûnwaran Dr. Silêman Ilyas bixêrhatina beşdaran kir. Piştre sînevîzyonek li ser madî û nemadî wekî avahiyên dîrokî, adet û hunerên Bakur û Rojhilatê Sûriyeyê hat pêşkêşkirin.

Mijara yekemîn ji aliyê endamê Tevgera Mezopotamya ya Çand û Hunera Demokratîk Îbrahîm Feqe û rêvebera Komeleya Çanda Suryanî Ruba El Firêhat ve hat nîqaşkirin. Mijar li ser belgekirina mîrasa nemadî wekî vîdyo, wêne û cil û bergan ji bo parastina mîrasa çandî bû.

Mijara duyemîn ji aliyê cîgirê Desteya Çandê ya kantona Cizîrê Sayil Muxlif û lêkolerê şûnwaran Yasir Şohan ve hat nîqaşkirin.

Muxlif destnîşan kir ku pêwist e mîrasa nemadî bi rêya pirtûk, rojname, dezgehên çapemeniyê, rêûresm û şahiyên civakî yên kevn were belavkirin û vejandin.

Di dawiya panelê de encamname wiha hat dayîn:

- Hevkariya bi saziyên perwerdeyê re û xistina mîrasa xwecihî di waneyên dibistanan de.

- Belgekirina dîjîtal a pîşeyên klasîk ên destan, çîrok û stranan bi rêya kamera û amûrên qeydkirinê da ku ji tevahî re berdest bin.

-Xebitîna li ser vejandina şevbuhêrkên berê û pêşxistina wan.

- Hevkariya bi saziyên berpirs re ji bo pêşîlêgirtina derbaskirina çandên biyanî bi rêya pêşketina teknolojiyê.

- Lidarxistina atolye û perwerdeyan ji ciwanan re, ji bo fêrkirina pîşeyên berê yên xwecihî.

- Vexwendina ji bo lidarxistina mîhrîcanekê li ser mîrasa nemadî ya xwecihî ku tê de hemû pêkhate hebin.

- Betalkirina birina bacan ji kargehên ku mîrasa nemadî vedijînin da ku wan teşwîq bikin û propagandaya berhemên wan werin kirin.

- Destekdayîn û belavkirina lêkolînên ku tecrûbeyên dewletên din dikin ku sûd ji wan werin girtin û li gorî rewşa xwecihî were pêkanîn.

-Ji bo pêşxistina aliyên erênî ya mîrasa çand û parastina wê ji windabûnê xebitîna bi cidiyeteke zêde û beşdariyeke mezin.

(mh/fr)

ANHA