Li Minbicê têkildarî hilbijartinan panel

Yekitiya Rewşenbîran a kantona Minbicê û Partiya Sûriya Pêşerojê (şaxê Idlibê) ji bo nîqaşkirina hilbijartinan li kantonê panelek li dar xist. Di panelê de şandeya Meclisa Leşkerî ya Minbicê, Rêveberiya Xweseriya Demokratîk a Minbicê, Partiya Sûriya Pêşerojê, Partiya Nûjen û Demokrasiyê ya Sûriyeyê û Kombûna Jinan a Zenûbiya beşdar bûn. Panel li pirtûkxaneya Mihemed Mela Xezîl a rojavayê bajêr hat organîzekirin.

Di panelê de hevserokê Meclisa Idlibê ya Partiya Sûriya Pêşerojê Ehmed Şeban diyar kir ku hilbijartin pêkanîna pratîkî ya Hevpeymana Civakî ye û ji bo xurtkirina binesaziya welat û welatiyan girîng e.

Şeban diyar kir ku xebata hilbijartinê mafê her welatiyekî ye û mafê her welatiyekî ye ku kesê guncaw hilbijêre. Eger welatiyek bibîne ku ew li gorî mercan e ku erkê xwe pêk bîne, erkê wî ye ku xwe ji bo hilbijartinan pêşniyar bike û bibe namzet û rola ku ew ê bilîze jî diyar bike.

Piştre beşdaran li ser girîngiya hilbijartinan, girîngiya hebûna kesên guncaw di cihên guncaw de û bandora erênî ya hilbijartinan li ser aliyên xizmetguzarî û jiyanî yên bajêr û herêmê bi giştî, nîqaş kir.

(mh)

ANHA