Li Helebê sînevîzyonek li ser komkujiya Şengalê hat pêşkêşkirin

Bi boneya nêzbûna salvegera 10ˊemîn a komkujiya li ser Şengalê ku di 2014ˊan de pêk hatiye, Mala Êzidiyan a Helebê sînevîzyonekê pêşkêş kir.

3'yê Tebaxa bê salvegera 10'emîn a komkujuya li dijî civaka êzîdî ya Şengalê ye. Ew komkujî ji aliyê çeteyên DAIŞ'ê ve piştî ku çekdarên Partiya Demokrat a Kurdistanê (PDK) reviyan, hat pêkanîn.

Çalakî li hola 8'ê Adarê ya taxa Şêxmeqsûd hat lidarxistin. Di serî de hevseroka Mala Êzîdiyan a Helebê Roşîn Mûsa şehîd bi bîr anîn û diyar kir ku komkujî û fermanên ku di dîrokê de li dijî civaka êzîdî hatine pêkanîn bi armanca qirkirina wan bûn.

Roşîn Mûsa banga bilindkirina asta têkoşînê li hemberî hewldanên qirkirina civakên Bakur û Rojhilatê Sûriyeyê kir û got li hember êrişên dewleta Tirk a dagirker û tevkariya PDKˊê bi dagirkeriyê re bisekinin.

Piştre sînevîzyonek li ser komkujiyê û bûyerên veşartî yên ku tê de qewimîne û aliyên hevkar ên ku destek didan çeteyên DAIŞ'ê hat pêşandan. Her wiha çawa Şengal piştî ku çekdarên PDK'ê reviyan ji aliyê Yekîneyên Parastina Gel (YPG), Yekîneyên Parastina Jin (YPJ) û Hêzên Parastina Gel (HPG) ve hat rizgarkirin.

Li gorî Rêxistinên Êzîdiyan, di êrişa 2014'an de çeteyên DAIŞ'ê 6 hezar û 417 êzîdî revandin, ji wan 3 hezar û 548 jin û 2 hezar û 869 zilam bûn. Di encama hemleyên rizgarkirinê yên ku paşê hatine lidarxistim de 3 hezar û 739 êzîdî hatin rizgarkirin. Ji wan hezar û 203 jin bûn. Çarenûsa yên din jî nediyar e.

(mh)

ANHA