Li Akademiya Şehîd Ferhad Dêrik dewreya perwerdeyê ya yekemîn
Li Akademiya Şehîd Ferhad Dêrik yekemîn dewreya perwerdeyê ji bo endamên Cîhazê Çavdêriya Giştî ya Rêveberiya Xweseriya Demokratîk a Herêma Bakur û Rojhilatê Sûriyeyê hate vekirin.
Cîgirê hevserokatiya Meclisa Rêveber a Rêveberiya Xweseriya Demokratîk a Herêma Bakur û Rojhilatê Sûriyeyê Ferhad Şiblî 17`ê Hezîrana 2022`yan, di êrişa balafireke bêmirov a dewleta Tirk a dagirker li herêma Kelarê ya Silêmaniyê yê Başûrê Kurdistanê de şehîd bûbû.
Bi rasthatina salvegera şehadeta wî ya duyemîn de, Rêveberiya Xweseriya Demokratîk a Herêma Bakur û Rojhilatê Sûriyeyê duh (24`ê Hezîrana 2024`an) akademiyek bi navê wî li kantona Reqayê vekir.
Piştî vekirinê bi rojekê Nivîsgeha Perwerdeya Rêveberî ya Rêveberiya Xweseriya Demokratîk a Herêma Bakur û Rojhilatê Sûriyeyê, dest bi dewreya yekemîn kir.
40 endamên Cîhaza Çavdêriya Giştî ya rêveberiyê tev li dewreyê bûne ku 15 rojan dewam dike. Di perwerdeyê de waneyên li ser qanûna peymanan, zanista jinan, dîroka Sûriyeyê, Şoreşa 19`ê Tîrmehê û waneyên têkildarî cîhazê, pergal û qanûnên wê têne dayîn.
Nivîsgeha Perwerdeya Rêveberî hewl dide ku bi rêya dewreyên perwerdeyê ji karmendên deste, daîre, nivîsgehên Rêveberiya Xweser re, şarezayên wan yên rêveberî pêş bixe.
(şx)
ANHA
