Kongreya Îslama Demokratîk Şêx Seîd û hevalên wî bi bîr anîn
Kongreya Îslama Demokratîk bi daxuyaniyekê Şêx Seîd û hevalên wî bi bîr anîn û diyar kir ku neviyên Şêx Seîd serhildana wî ya li dijî zilmê didomînin.
Kongreya Îslama Demokratîk a Herêma Bakur û Rojhilatê Sûriyeyê bi daxuyaniyeke nivîskî Şêx Seîd Pîran û hevalên wî bi bîr anîn.
Di daxuyaniyê de Serhildana Şêx Seîd hate bibîrxistin û hate diyarkirin ku Şêx Seîd li hember siyasetên qirkirina Kurdan, çewisandin û tunekirina wan serî hilda.
Di daxuyaniyê de îşaret bi vê yekê hate kirin ku bikaranîna ola îslamê yek ji stûnên avakirina dewleta Tirk bû û hate gotin: "Komkujiyên ku bi navê îslamê li dijî gelê Kurd ê aştîxwaze û oldarên wê hatine kirin, vê yekê îsbat dike."
Di daxuyaniyê de Şêx Seîd û hevalên wî yên hatin darvekirin, hatin bibîranîn û hate gotin: "Li ser şopa Şêx Seîd neviyên wî çirûska serhildanê gûr kir, hêviyên Şêx Seîd bi cih anîn û ji bo ku ala edaletê li ba be tê dikoşin."
Di daxuyaniyê de zihniyeta çewisandin, inkarkirin û qirkirinê hatin şermezarkirin û soz hate dayîn ku Kongreya Îslama Demokratîk bibe dengê mezlûman.
(şx)
