Îsraîl û Îran; ji nû ve xêzkirina nexşeya pêşîgirtina li Rojhilata Navîn

Rojnameyên erebî yên vê sibehê bal kişand ser aliyên êrişa leşkerî ya Îsraîlê ku wek qonaxa nû ya rûbirûbûna herêmî ya hebûnê ye û bi van êrişan ji nû ve pêşîlêgirtin û serweriya herêmî tên diyarkirin.

‛HILWEŞANDINA DÎWARAN HETA BI NAVENDÊ’

Rojnameya El Ereb di nivîsa xwe de diyar kir ku êrişa dawîn a Îsraîlê li kûrahiya xaka Îranê nikare dûrî stratejiya berfireh were fêmkirin û bi "Hilweşandina dîwaran heta bi navendê" hat wesifkirin. Rojnameyê da zanîn ku vê hilweşandinê ji têkbirina wekîlên Îranê wekî Hemas û Hizbullahê dest pê kir û gihaşt hedefgirtina pergala Îranê bi xwe.

Li gorî vê analîzê, Îsraîl li ser du xalan dixebite; ya yekemîn wêrankirina bernameya nukleerî û ya duyemîn jî qelskirina navenda biryardanê ya Îranê. Îsraîl bi rêya hedefgirtina zanyaran, navendên fermandariyê, binesaziyên leşkerî yên hesas plana xwe pêk tîne.

‛JI DEMA ŞERÊ IRAQ-ÎRANÊ VE EV ÊRIŞA LEŞKERÎ YA ÎSRAÎLÊ XETERNAKTIR Û FIREHTIR E’

Girêdayî heman mijarê, rojnameya El Qudis El Erebî bi sernavê "Ji dema şerê Iraq-Îranê ve ev êrişa leşkerî ya Îsraîlê xeternaktir û firehtir e" nivîsek parve kir. Rojnameyê aşkera kir ku heta niha di encama êrişa Îsraîlê de nêzî 20 fermandarên leşkerî û 6 zanyarên nukleerî hatine kuştin, navendên nukleerî û cihên avêtina moşekan hatine wêrankirin. Li gorî rojnameyê ev êriş encama hevkariya îstîxbaratî û leşkerî ya Amerîka-Îsraîlê bû.

Rojnameya Şerq El Ewset jî diyar kir ku diviyabû ev şer beriya 20 salan pêk bihata, lê ji ber hin hesabên pêşîlêgirtin û şerê wekaletan dereng ma. Bi êrişê re êdî armanca Îsraîlê diyar bû; tecrîdkirina Îranê ji hêza wê ya nukleerî û moşekan. Rojnameyê aşkera kir ku êdî Til Avîv bi "birîna têkilliyê" ya bi wekîlên Îranê re razî nebû û biryar da ku êrişî Îranê bi xwe bike.

(fr)