Cenazeyê şehîd Ehmed El Xelef hat oxirkirin

Meclisa Malbatên Şehîdan li gundewarên rojhilatê Dêrazorê îro merasîma oxirkirina şervanê QSD’ê şehîd Ehmed Necî El Xelef li dar xist. Şehîd Ehmed Nacî di 9`ê Mijdarê de dema ku li Dêrazorê erka xwe ya leşkerî pêk dianî, şehîd bûbû.

Serokên eşîran, rûspiyên herêmê, nûnerên hêzên leşkerî, malbatên şehîdan, saziyên sivîl û Rêveberiya Xweser a Kantona Dêrazorê û bi dehan şênî tev li merasîmê bûn.

Merasîmê bi deqeyeke rêzgitinê û merasîmeke leşkerî dest pê kir. Piştre ji fermandarên Meclisa Leşkerî ya Hecînê Xebat Şiêtî axivî û sersaxî ji malbata şehîd re xwest û got: “Em wek Hêzên Sûriyeya Demokratîk dibêjin ku em ê bi israr rêya şehîdên xwe bişopînin û em ê li dijî hemû planên terorîst ên ku dixwazin ewlehî û aramiya herêmên me têk bibin, li ber xwe bidin.”

Hevseroka Meclisa Malbatên Şehîdan Îman Xelef jî di axaftina xwe de sersaxî ji malbata şehîd re xwest û soz da ku heta ku armancên şehîdan pêk werin, têkoşînê bidomînin.

Piştî axaftinan belgeya şehadetê ya şehîd hat xwendin û radestî malbata wî hat kirin. Cenazeyê şehîd bi dirûşm û tilîliyan spartin axê.

(k)

ANHA